.webp){kind=icon}
Македонска берза организира „Инвеститорски ден“ во вторник на 13 септември. Од берзата велат дека ова се прави со цел да се промовира уште поактивно учество на домашните индивидуални инвеститори на македонскиот пазар на хартии од вредност и за вложување на населението во акции издадени од домашните компании што се тргуваат на Македонска берза.
Со настанот се очекува зголемување на знаењето за овие финансиски инструменти и подобрување на инвестициската култура во нашата држава. Инвеститорски ден на берзата се организира по трет пат, а како што се информира, иницијативата ја прифатиле и во неа активно се вклучиле Централниот депозитар за хартии од вредност, сите десет членки на Берзата и ЦДХВ, а дека добиле поддршка и од Комисијата за хартии од вредност.
„Одржувањето на „Инвеститорскиот ден“ значи дека на тој ден на тргување на Берзата сите домашни физички лица можат да тргуваат со акции на сите пазарни сегменти без трансакциски трошоци што ги наплатуваат овластените пазарни институции и учесници.
Поконкретно, на „Инвеститорскиот ден“ сите домашни физички лица ќе можат да купат или продадат кои било акции без да ги платат провизиите кон Берзата, ЦДХВ и овластените пазарни учесници (банки и брокерски куќи) што се вклучени во оваа иницијатива, при што ќе треба да бидат исполнети следните услови - инвеститорите да склучат нормални трансакции со акции преку БЕСТ системот, со посредство на некоја од подолу наведените членки на Берзата; Износот на остварениот дневен промет по индивидуален инвеститор да не изнесува повеќе од 10.000 евра, независно од бројот на берзански трансакции преку кои истиот ќе биде остварен;
Трансакциите да бидат склучени преку клиентска, односно сопственичка сметка, објаснуваат од Берзата.
