Тивкиот одлив на биткоинот го погодува криптопазарот, долгогодишни инвеститори продаваат

Најдолгорочните инвеститори во биткоинот и натаму продаваат, а притисокот веќе почнува да се чувствува.

Повеќе од два месеца откако токенот достигна рекордно ниво над 126.000 долари, биткоинот падна за речиси 30 отсто и се мачи да најде стабилна поддршка. Една од причините е што неговите долгогодишни сопственици не престануваат со продажба. Новите податоци од блокчејнот покажуваат дека биткоини што со години биле во сопственост на истите инвеститори сега се продаваат со едно од најбрзите темпа во поновата историја, токму во момент кога способноста на пазарот да ги апсорбира тие количества слабее.

Според извештај на К33 (K33 Research), количеството на биткоини што не биле помрднати најмалку две години се намалила за 1,6 милион монети од почетокот на 2023 година, што е вредност од околу 140 милијарди долари. Тоа укажува на континуирана продажба од страна на долгорочните инвеститори.

Само во 2025 година речиси 300 милијарди долари во биткоин што бил неактивен повеќе од една година повторно влегле во оптек. Компанијата за блокчејн-аналитика „Криптоквант“ (CryptoQuant) соопшти дека во изминатите 30 дена е забележана една од најголемите дистрибуции од долгорочни сопственици во повеќе од пет години.

„Пазарот се соочува со постепен, но постојан пад, бидејќи биткоинот континуирано се продава на спот-пазарот во услови на слаба побарувачка. Таквиот пад е побавен, но потежок за запирање од наглите распродажби што настануваат поради високо задолжено тргување“, изјави Крис Њухаус, директор за истражување во „Ергонија“ (Ergonia), компанија специјализирана за децентрализирани финансии.

Bloomberg

По краткиот скок во средата до 90.000 долари, кој трговците му го припишаа на бранот ликвидации на кратки позиции, биткоинот брзо го продолжи падот. Оригиналната криптовалута повторно се спушти кон долниот дел од трговскиот опсег забележан по падот во октомври, при што загуби и до 2,8 отсто, на 85.278 долари. Во четвртокот во 10 часот по локално време во Сингапур се тргуваше малку над 86.000 долари.

 

 

„За разлика од претходните циклуси, овие повторни активирања не се поттикнати од тргување со алткоини или стимуланси од протоколите, туку од длабока ликвидност што доаѓа од американските ЕТФ-ови и побарувачката од државните трезори. Тоа им овозможува на најраните инвеститори да реализираат добивки по цени со шест цифри и значително ја намалува концентрацијата на сопственост“, изјави Ветле Лунде, виш аналитичар во К33, осврнувајќи се на скратеницата ОГ (OG), жаргон што криптозаедницата го користи за првите инвеститори во биткоинот. Количествата забележани оваа и минатата година „претставуваат втора и трета најголема реактивација на долгорочно чуван биткоин во историјата, надминати само од 2017 година“.

Отворениот интерес, бројот на активни договори, и кај опциите на биткоин и кај трајните фјучерси, останува далеку под нивото пред падот во октомври, покажуваат податоците на „Коинглас“ (Coinglass). Овој пад укажува дека поголемиот дел трговци сè уште се настрана, со оглед на тоа што овие пазари учествуваат со најголем дел од вкупниот обем на тргување со криптовалути. Во исто време, таканаречената базис-трговија, стратегија за заработка од ценовните разлики меѓу спот-пазарите и фјучерсите, стана непрофитабилна за хеџ-фондовите.

Сепак, според Лунде, продажбата од страна на долгогодишните сопственици на биткоин можеби се приближува кон крајот, бидејќи реактивацијата се доближува до прагот утврден врз основа на историските движења на податоците на блокчејнот.

„Гледано нанапред, притисокот од страната на понудата од долгорочните сопственици изгледа поблиску до заситување, со околу 20 отсто од вкупната понуда на биткоин реактивирана во изминатите две години“, напиша Лунде. „Очекувањата се дека продажбата од првите инвеститори ќе ослабне во 2026 година, овозможувајќи зголемување на двегодишната понуда, додека биткоинот се движи кон нето-побарувачка од страна на купувачите, во услови на подлабока институционална интеграција.“