.webp){kind=icon}
Мекото приземјување станува сè поверојатно сценарио за светската економија, која ќе продолжи да обезбедува поволен ветер за ризичните средства, според стратезите на JPMorgan Chase & Co.
Неодамнешните податоци кои укажуваат на ублажување на инфлацијата и притисокот врз платите, заживување на растот и стабилизирање на довербата на потрошувачите, сугерираат дека светот ќе ја избегне рецесијата, напиша во понеделникот тимот во кој биле вклучени и Марко Колановиќ и Николаос Панигирцоглу. Пазарите може да имаат корист од фискалните стимулации во Кина, плановите за енергетска поддршка во Европа и многу ниското расположение на инвеститорите, велат тие.
„Економските податоци и позиционирањето на инвеститорите се поважни двигатели на перформансите на ризичните средства отколку реториката на централните банки“, нагласуваат стратезите, кои порачаа дека тие го задржуваат ставот во однос на ризикот.
Во последните денови на пазарите се врати позитивното расположение поради надежите дека инфлацијата можеби го достигнала врвот, барем во САД. Во понеделникот, светскиот индекс MSCI AC го заврши својот најголем четиридневен скок од мај, додека трговците се подготвуваа за денешните клучни податоци за потрошувачките цени во САД.
JPMorgan тврди дека постепеното ублажување на инфлацијата треба да биде позитивно за цикличните и акциите со мала капитализација, кои ги фаворизира заедно со пазарите во развој и кинеските акции во однос на „скапите“ одбранбени средства. Од таму се залагаат за купување енергетски акции и одржуваат „агресивна“ прекумерна тежина кај суровините.
„Веруваме дека инфлацијата ќе се реши сама по себе бидејќи нарушувањата ќе исчезнат и дека ФЕД претера со зголемувањето од 75 базични поени“, напиша тимот.
Стратезите се позитивни на доларот и очекуваат да се израмнат кривите на принос на американските и европските обврзници.
JPMorgan не е сам во ваквиот став.
Постоечките податоци укажуваат на тоа дека мекото приземјување е местото кон кое се движи светската економија, рече во интервју Исак Пул, главен инвестициски директор во Oreana Financial Services Ltd. „Во тоа сценарио, ние всушност мислиме дека заработката би можела да биде релативно добра следната година во САД. Растот на заработката може да изненади нагоре, бидејќи во него имаше многу песимизам“, објаснува тој.
