Трговците на „Голдман“ предупредуваат дека распродажбата на акции не е завршена

Американските акции, откако закрепнаа во петокот и речиси ги анулираа силните падови од средината на неделата, неделава би можеле да се соочат со дополнителна распродажба, бидејќи се очекува фондовите што користат алгоритми и следат трендови да започнат да ги продаваат, проценуваат во одделот за трговија на „Голдман Сакс“ (Goldman Sachs Group Inc).

Индексот S&P 500 веќе го надмина краткорочниот праг што ги поттикна CTA-фондовите да продаваат акции. „Голдман“ очекува дека овие алгоритамски стратегии што го следат движењето на пазарот, а не фундаменталните показатели, ќе продаваат повеќе отколку што ќе купуваат во текот на неделата, без разлика на насоката на движењето на пазарот.

Ново слабеење на пазарот може да поттикне продажба на акции во вредност од околу 33 милијарди долари во текот на оваа недела, се наведува во процените на „Голдман“. Ако притисокот продолжи и S&P 500 падне под 6.707 поени, тоа би можело да поттикне продажба во вредност од 80 милијарди долари во текот на следниот месец, која би била базирана на алгоритамски модел, покажуваат податоците на банката. Ако на пазарот нема поголеми промени, се очекува дека CTA-фондовите оваа недела ќе продадат околу 15,4 милијарди долари американски акции, а дури и ако цените на акциите пораснат, се предвидува дека ќе ги намалат позициите за околу 8,7 милијарди долари.

Минатата недела инвеститорите беа под голем стрес. Индексот на паника на оваа банка, кој ги комбинира едномесечните имплицитни волатилности на индексот S&P 500, VIX волатилноста (VVIX), односот на продажните и куповните опции (put-call skew) за S&P 500 за период од еден месец и промената на очекуваната волатилност според рокот на индексот S&P 500, последен пат изнесуваше 9,22, што укажува дека пазарите во четвртокот беа блиску до нивоата на „целосен страв“.

S&P 500 во петокот скокна за два отсто, завршувајќи ја нестабилната недела со најголема добивка уште од мај. Растот следуваше по големиот пад на индексите S&P 500 и Nasdaq 100 на почетокот на неделата. Падот беше поттикнат од лансирањето на новата алатка за вештачка интелигенција за автоматизација од компанијата „Антропик“ (Anthropic PBC). Овој потег ја намали пазарната вредност на акциите на софтверските компании, финансиските услуги и фондовите за управување со имот за милијарди долари, додека инвеститорите повторно ги преценуваа ризиците од нарушувања. Цените на фјучерсите на индексот 500 компании пораснаа за 0,2 отсто во 20:27 по њујоршко време.

Позиционирањето во таканаречените алгоритамски стратегии беше најчесто прашање што клиентите му го поставуваа на „Голдман“ во петокот, што покажува голема потреба за увид во тековите на капиталот на пазарот.

Покрај CTA-продажбата, слабата ликвидност и „short gamma“ позиционирањето (изложено на поголем ризик поради нагли промени; дилерот е на спротивната страна на опцијата и губи кога цената на индексот брзо расте или паѓа) ќе го одржуваат пазарот нестабилен, со можност за дополнително зајакнување на движењето во двата правци, бидејќи дилерите купуваат кога цените растат, а продаваат кога паѓаат за да ги израмнат своите позиции.

Достапната ликвидност по котираната цена за S&P, односно обемот на куповните и продажните налози достапни по најдобрата куповна и најниската продажна цена, нагло се влоши и падна на околу 4,1 милион долари, од просекот од приближно 13,7 милиони долари од почетокот на годината.

„Тешкотиите во брзо преместување на ризиците ги зголемуваат дневните осцилации на цените и го забавуваат стабилизирањето на пазарот“, се наведува во белешката на тимот за трговија на „Голдман“.

Позиционирањето на дилерите на опции исто така се променило на начин што може да ги поттикне пазарните движења. По периодот на таканаречени „long gamma“ позиции (дилер или фонд е на страната на опцијата што профитира од нагли промени на цената; дејствува стабилизирачки на пазарот), што помогна да се спречи пробивањето на индексот S&P 500 од ниво од 7.000 поени, се проценува дека дилерите сега се неутрални или во „short gamma“ режим. Овој ефект е уште поизразен кога ликвидноста е слаба.

„Врзете ги појасите“, велат трговците.

Други систематски или алгоритамски стратегии сè уште имаат значителен простор за намалување на ризикот. Фондовите за паритет на ризик (инвестициски фондови што ги распределуваат инвестициите по ризик, а не по вредност на имотот; нивна цел е секоја класа имот да придонесе еднакво за вкупниот ризик на портфолиото) во моментов се многу изложени на пазарот, на 81. перцентил во однос на последната година (поголема изложеност на пазарот отколку што беа во 81 отсто од деновите во последните 12 месеци), додека фондовите што ја контролираат волатилноста се на 71. перцентил. За разлика од CTA-фондовите, овие фондови реагираат на трајните промени во волатилноста, што значи дека нивното влијание ќе биде посилно ако волатилноста остане зголемена. Реализираната волатилност на S&P 500 расте, но 20-дневниот индикатор сè уште е под нивоата што беа забележани во ноември и декември.

Сезонските фактори не нудат многу олеснување. Февруари историски гледано е послаб и нестабилен месец и за S&P 500 и за Nasdaq 100, бидејќи поволните текови од јануари, вклучувајќи ги уплатите за пензиските фондови и врвот на активноста на малите инвеститори, постепено се намалуваат.

И однесувањето на малите инвеститори покажува знаци на замор. По една година упорно купување акции при падот на цените, најновиот дводневен нето-биланс на малите инвеститори покажа околу 690 милиони долари нето-продажби минатата недела, што укажува на намалена подготвеност да се купува при секој пад на цените.

Популарните позиции на малите инвеститори поврзани со криптовалути и акции поврзани со крипто беа особено силно погодени, што го зголемува ризикот дека евентуално пошироко повлекување од американските акции ќе донесе значителен пресврт во однос на обрасците на тргување од минатата година.