Омилените тргувања на Волстрит се уриваат, се продлабочува пазарната распродажба

Секојдневната безумна трка по најпопуларните тргувања низ цел Волстрит – од технолошки акции, преку злато, до криптовалути – прерасна во ненадејно повлекување од ризик.

Нема една конкретна причина, како што беше случајот лани во април, кога трговската војна на претседателот Доналд Трамп ги фрли пазарите во спирала на страв. Наместо тоа, станува збор за бавен, постојан наплив на вести што создава вознемиреност околу вреднувањата, за кои многумина веќе се сомневаа дека се претерано надуени – поради што инвеститорите истовремено се повлекоа.

Тоа повторно јасно се виде во четвртокот, кога S&P 500 падна за 1,2 отсто, трет последователен дневен пад, а Nasdaq 100 го продлабочи најголемиот пад од април наваму. Акциите на софтверските компании го продолжија падот откако стартапот за вештачка интелигенција „Антропик“ (Anthropic) претстави нов модел наменет за спроведување финансиски истражувања, вторпат оваа недела компанијата ги вознемири пазарите, нагласувајќи ја конкурентската закана од новата технологија.

Среброто, кое редовно го следеше златото до рекордни нивоа, се урна за 20 отсто. Биткоинот падна за повеќе од 13 отсто, бришејќи ги сите добивки остварени од изборот на Трамп пред 15 месеци, додека инвеститорите се справуваа со тргувањата со загуби финансирани со позајмени пари. Американските државни обврзници пораснаа, повторно преземајќи ја својата вообичаена улога на засолниште во крајна нужда. А по затворањето на берзите, „Амазон“ (Amazon.com Inc.) потона за повеќе од 11 отсто откако соопшти дека годинава планира да инвестира 200 милијарди долари, далеку повеќе од процените на аналитичарите, кои сè повеќе се загрижени дека технолошките компании претерано трошат на ВИ.

Оваа нервоза се прелеа и во Азија по отворањето на пазарите, при што јужнокорејските акции во еден момент потонаа за повеќе од 5 отсто, а производителите на чипови „Самсунг електроникс“ (Samsung Electronics Co.) и „СК Хајникс“ (SK Hynix Inc.) го предводеа падот. Акциите низ регионот во раното тргување паднаа за околу 1 отсто, додека фјучерсите поврзани со Nasdaq укажуваа на дополнителни загуби.

„Луѓето дефинитивно стануваат попретпазливи“, изјави Брајан Френк, претседател и портфолио-менаџер во „Франк фондс“ (Frank Funds). „Ова е повеќе средина во која прво се пука, па се поставуваат прашања.“

Bloomberg

Неодамнешните движења означуваат јасен пресврт во однос на расположението на Волстрит на почетокот на годината, кога стратезите прогнозираа дека акциите се подготвени за најдолгата добитна серија во речиси две децении. Тие прогнози се темелеа на очекувањата дека бумот на ВИ ќе продолжи, дека изненадувачки отпорната економија и понатаму ќе ги зајакнува корпоративните профити и дека Федералните резерви ќе започнат со намалување на каматните стапки.

Таквата слика во голема мера сè уште опстојува, што се гледа и од солидните финансиски резултати што компаниите ги објавуваат во последните недели. Но во исто време повторно се засили фокусот и на дел од растечките ризици: компаниите што би можеле да бидат истиснати од бумот на ВИ; прашањата околу насоката на Федералните резерви доколку изборот на Трамп, Кевин Ворш, биде потврден како наследник на Џером Пауел на чело на институцијата; како и пренапрегнатите вреднувања кај средствата како златото, биткоинот, па дури и кај технолошките гиганти како „Алфабет“ (Alphabet Inc.), кои на долг рок можеби нема да бидат одржливи.

Свежите податоци од пазарот на трудот во четвртокот дополнително го зголемија притисокот врз пазарите. Новите бројки од „Челенџер, Греј енд Крисмас“ (Challenger, Gray & Christmas Inc.) покажаа дека компаниите објавиле најголем број отпуштања за јануари од 2009 година, односно од времето на големата рецесија, што ги засили стравувањата дека економскиот замав можеби почнува да попушта.

Софтверските акции, биткоинот, среброто и златото забележаа остар пад

Bloomberg

Пресвртот беше најдраматичен кај биткоинот. По метеорскиот раст во поголемиот дел од минатата година, откако победата на Трамп поттикна шпекулативен налет кон криптовалутите, пазарот на вакви токени овој месец нагло падна, бидејќи инвеститорите повлекоа готовина.

Во четвртокот распродажбата на биткоинот се продлабочи кон крајот на трговскиот ден, повлекувајќи надолу и други токени, берзански тргувани фондови, како и компании од типот на трезорски фирми што држат огромни количества монети, меѓу кои и „Стратеџи“ (Strategy Inc.). До доцните попладневни часови во Њујорк, биткоинот падна за 13 отсто, на нешто над 63.000 долари, бришејќи приближно половина од вредноста од моментот кога достигна рекорд пред четири месеци.

„Стравот и неизвесноста на пазарите се очигледни“, изјави Крис Њухаус, раководител за развој на бизнис во „Ергонија“ (Ergonia).

На пазарот на акции, падот беше поумерен. Сепак, притисокот беше широко распространет, при што девет од 11-те главни индустриски групи во S&P 500 се повлекоа. Покрај загриженоста околу тоа кои компании ќе завршат на губитничката страна од технологијата на ВИ, инвеститорите се прашуваат и дали најголемите инвестиции во оваа област навистина ќе се исплатат. Тоа се виде и кај падот на матичната компанија на „Гугл“, (Google) „Алфабет“ (Alphabet Inc.), чии акции се лизнаа откако компанијата најави амбициозен план за трошење, иако приходите ги надминаа процените.

Ким Форест, главна инвестициска директорка во „Боке капитал“ (Bokeh Capital Partners), изјави дека неодамнешното повлекување е одраз на стравувањата дека најжешките акции и другите средства, како златото, едноставно прераснале премногу и дека било време за мало соочување со реалноста.

„Ова е ресетирање“, рече таа. „Растот можеби едноставно се истроши.“