Рекордни 134 милијарди долари од тргување - директорите на банките уверени дека ова е само почеток

Главниот извршен директор на „Морган Стенли“ (Morgan Stanley) Тед Пик, по исклучително успешната година за тргување на Волстрит, ја сумираше својата оценка со три збора збора: „Поставеноста е идеална“.

Откако петте најголеми банки на Волстрит пријавија рекордни 134 милијарди долари приходи од тргување во минатата година и раст на активноста во склучувањето зделки, Пик и неговите колеги се согласија дека тој тренд е подготвен да продолжи – иако со одредени резерви.

„Како некој што ги следи овие бизниси со децении, би се обложил дека 2021 година не е горната граница“, изјави извршниот директор на „Голдман сакс“ (Goldman Sachs Group Inc.) Дејвид Соломон, алудирајќи на претходната рекордна година за трговските активности на финансиските институции. „Светот во моментов е поставен на начин што може да биде исклучително поволен во 2026 година за спојувања и преземања и за активностите на пазарите на капитал, и мислам дека најверојатното сценарио е да имаме навистина многу добра година.“

Трамп му донесе на Волстрит 134 милијарди долари приходи од тргување
Приходите од тргување пораснаа за 15 отсто во 2025 година – најголем скок во последните пет години

Bloomberg

Политички турбулентните одлуки на американскиот претседател Доналд Трамп и трговските преговори ги држат инвеститорите во неизвесност – но токму таквата средина продолжува да им носи добивки на трговците во банките, бидејќи клиентите брзаат да ги прераспределат своите портфолија. Во исто време, напорите на неговата администрација за дерегулација и намалувањето на каматните стапки од страна на Федералните резерви го оживуваат заспаниот пазар за спојувања и преземања, брзо полнејќи ги листите со нови зделки.

Откако „Морган Стенли“ и „Голдман сакс“ во четвртокот ги објавија кварталните резултати, по извештаите на нивните најголеми конкуренти, овие пазарно ориентирани институции дополнително ги зајакнаа прогнозите за уште една исклучително силна година за активностите на Волстрит. Тоа е во контраст со другите сегменти на банкарството, како што се одделите за кредитни картички, кои се под притисок откако Трамп побара ограничување на каматните стапки. Директорите во индустријата веќе се соочуваат со прашања како ќе одговорат на ваквите барања, додека и самите чекаат појасни насоки од Белата куќа.

Но, барем за одделите за тргување, добрите времиња би можеле да продолжат.

Подемот во тргувањето е во „средната фаза од натпреварот“, им рече Пик на аналитичарите, користејќи бејзбол аналогија. „Во моментов сме во таа поволна зона, за разлика од класичното инвестициско банкарство, кое е во порана фаза.“

Раководството на „Голдман сакс“ оцени дека нивната листа на договори за советодавни услуги, издавање долг и акции е најголема во последните неколку години – и меѓу најсилните досега.

Акциите на „Морган Стенли“ и „Голдман сакс“ забележаа најголем раст од април, поскапувајќи за 5,8 односно 4,6 отсто, откако ги објавија резултатите.

Шесте најголеми банки во САД – во кои спаѓаат и „ЈП Морган“ (JPMorgan Chase & Co.), „Банка на Америка“ (Bank of America Corp.), „Ситигруп“ (Citigroup Inc.) и „Велс Фарго“ (Wells Fargo & Co.) – оваа недела заеднички ја пријавија највисоката годишна добивка од 2021 година. Тие лани исплатија и повеќе од 140 милијарди долари во дивиденди и откуп на акции, надминувајќи го рекордот поставен во 2019 година.

И покрај неочекуваниот прилив на приходи, неколку банки кои вложуваа значителни средства во технолошки надградби нагласија дека сега поголем фокус ставаат на зголемување на ефикасноста – што може да вклучи и кратење работни места. Само минатата година групата укина околу 10.600 позиции, најмногу во речиси една деценија, а дел од институциите навестија дека можни се и дополнителни чекори во таа насока.

Сепак, кога станува збор за изгледите на Волстрит, преовладува оптимизам. Во „ЈП Морган“, главниот финансиски директор Џереми Барнум зборуваше за „конструктивна пазарна динамика, која се отсликува во нашата листа на зделки“. Во „Банка на Америка“, финансискиот директор Аластер Бортвик оцени дека „провизиите од инвестициското банкарство покажаа солиден замав“.

Меѓу предупредувањата се најдоа и забелешки за високите цени на активите – со импликација дека акциите и другите инвестиции, кои доживеаја силен раст, би можеле драматично да паднат, што би довело до повлекување на трговската активност, ако не и до загуби во сопствените портфолија на банките.

И дури и ако економијата изгледа стабилно на влезот во 2026 година, постои „огромна количина ризик“ што може неочекувано да промени сè, предупреди извршниот директор на „ЈП Морган“ Џејми Дајмон. „Мора да се справуваме со светот каков што е, а не со светот каков што би сакале да биде. И ние никогаш не нагаѓаме за исходот.“

Токму тоа е една од причините зошто директорите на банките се воздржаа од поконкретни прогнози за идните добивки. Во „Морган Стенли“, раководството посочи дека засега нема намера да ги зголемува поставените цели, барем не во првата половина од годината.

„Секако, во ова има и елемент на постојано бркање нови рекорди“, рече Пик. „Еднаш кога ќе ги достигнете целите, чувствувате потреба повторно да ги подигнете очекувањата.“