Стравот предизвика распродажба на берзите, аналитичарите смируваат: Ваквата волатилност е нормална

Утрово се разбудивме со деловни индекси обоени во црвено и предупредувања дека песимизам го зафати Волстрит. Во четвртокот финансискиот свет го потресе порастот на нестабилноста, при што индексот на волатилност VIX, кој многумина го нарекуваат индекс на стравот, скокна за цели 15 отсто.

Индексот S&P 500 вчера падна за 1,66 отсто, а технолошкиот Nasdaq за 2,29 отсто.

Ненадејното избегнување ризик во четвртокот предизвика силен пад на некои од најскапите акции и го продлабочи последниот пад на криптовалутите. Многу аналитичари како најверојатен поттик за распродажбата ја посочија сѐ помалата веројатност дека Фед повторно ќе ги намали каматите во декември, пренесе „Блумберг“.

И некои функционери на Федералните резерви (Фед) дополнително го поттикнаа распродажниот притисок. Претседателот на Фед во Минеаполис, Нил Кашкари, им се приклучи на скептиците околу потребата за ново намалување на каматите во декември. Ако пред една недела 72 проценти од трговците очекуваа дека Фед ќе ги намали каматите, денес такво мислење има само половина од нив.

„Пазарот падна, но тоа е дел од вообичаената дневна или неделна нестабилност – понекогаш паѓа, понекогаш расте“, изјави Матеј Вујаниќ, аналитичар на „Блумберг Адрија“, коментирајќи го вчерашниот пад на пазарот. 

„Поширокиот контекст, долгорочниот правец на движење и фундаментите се најважни. Во суштина, од вчера до денес не се смени ништо. Доколку дојде до промена, како слаби резултати кај компаниите за вештачка интелигенција или лоши макроекономски показатели, тогаш ќе видиме вистинска корекција. Дотогаш, трендот нагоре би требало да продолжи, секако со волатилност како денешната, што е нормално“, појаснува тој.

Токму американските технолошки гиганти што јаваат на бранoт на ВИ-бумот вчера загубија значителен дел од својата вредност. „Енвидија“ падна за 3,6 отсто, „Бродком“ за 4,3 отсто, а „Палантир“ за 6,5 отсто.

 

 

Корисниците на бумот со вештачка интелигенција веќе почнаа да попуштаат во последните недели, бидејќи загриженоста околу преценетоста и огромните капитални трошоци ги натераа инвеститорите да почнат да собираат добивки. На тоа се надоврзуваат и извршните директори на технолошките компании, кои за „Си-ен-би-си“ изјавија дека стравуваат од создавање ВИ-меур.

„Ветувањето за пониски камати беше причината поради која многу инвеститори беа подготвени да ги игнорираат високите вреднувања на акциите со најсилен подем“, изјави за „Блумберг“ Мет Мали, главен пазарен стратег во „Милер табак“. „Сега, кога тоа ветување станува помалку убедливо, инвеститорите ја намалуваат својата изложеност кон овие скапи имиња.“

Расположението се прелеа и на пазарот на криптовалути, каде што најголемата дигитална валута, биткоинот, падна уште подлабоко под границата од 100.000 долари, под притисок на новиот бран избегнување ризик и распродажбата кај технолошките акции.

 

Дигиталната валута вчера падна за 3,9 отсто – на 97.956 долари – продлабочувајќи го падот што од почетокот на октомври избриша над 450 милијарди долари пазарна вредност. Во моментот на пишување, за еден токен требаше да се издвојат нешто над 97 илјади долари.

Bloomberg

Важни се долгорочните цели“

„Историјата нè учи дека берзите минувале низ подеми и падови, но на долг рок секогаш се враќале на патеката на раст. На пример, американскиот берзански пазар во просек доживува три корекции од 5 отсто годишно, една корекција од 10 отсто и на секои неколку години и поголеми падови. Но, и покрај тие флуктуации, на долг рок пазарите растат“, порачаа од „Генерали инвестментс“ по една претходна пазарна корекција.

Тие советуваат учесниците на пазарот да се фокусираат на своите долгорочни цели: „Инвеститорите што остануваат со своите инвестиции и за време на падови, на долг рок често остваруваат повисоки приноси од оние што реагираат импулсивно.“

Од „НЛБ фондови“ наведуваат дека „во човечката природа е посилно да ги чувствуваме загубите отколку добивките. Затоа една од клучните грешки што треба да се избегнат е носење одлуки за долгорочни инвестиции – на пример за период од 10 години – врз основа на краткорочни движења на берзите, како оние во период од еден месец. Од страв од краткорочни загуби често избираме помалку ризични и помалку профитабилни вложувања, занемарувајќи ги оние што во период од 10 години би донеле значително повисоки приноси.“