Берзите паѓаат додека расте неизвесноста околу Фед во пресрет на клучните податоци

Распределбата на акциите повторно се засили на Волстрит, прекинувајќи ја неделната пауза поттикната од повторното отворање на владата на САД, откако изјавите на функционери на Федералните резерви (Фед) во пресрет на економскиот бран податоци ги натераа трговците да се ослободуваат од ризичните средства – од технолошки акции до криптовалути.

Откако оптимизмот поради надминувањето на блокадата веќе беше вграден во цените, повторно се појави загриженост за преценетоста на пазарот, што предизвика распродажба на технолошките гиганти. Некои од аналитичарите посочија и на ротација кон поодбранбени акции. Ова е третпат во две недели индексот S&P 500 да падне за повеќе од 1 отсто. Биткоинот се спушти под 100.000 долари и е во пад од над 20 отсто од почетокот на октомври.

Bloomberg

Претседателот Доналд Трамп ја потпиша законската одлука со која му се става крај на најдолгото затворање на федералната влада во историјата на САД, но ќе биде потребно време администрацијата целосно да се рестартира. Извештајот за вработувањето за октомври ќе го изостави податокот за невработеноста, изјави главниот економски советник Кевин Хасет за „Фокс њуз“.

Додека функционерите на Федералните резерви сигнализираат претпазливост околу идните намалувања на каматите, очекувањата на пазарот за намалување во декември паднаа под 50 отсто.

Во одделни изјави претседателот на Фед на Сент Луис, Алберто Мусалем, порача дека функционерите треба внимателно да се движат со каматите бидејќи инфлацијата е над целта, додека неговата колешка од Кливленд, Бет Хамак, оцени дека политиката треба да остане „делумно рестриктивна“. Претседателот на Фед на Минесота, Нил Кашкари, рече дека не го поддржал последното намалување и дека е неодлучен за декември.

Претседателот на Фед, Џером Пауел, минатиот месец истакна дека ново намалување „не е загарантирано“ и дека одлуката ќе зависи од економските податоци што треба да пристигнат. Некои од трговците стравуваат дека изоставувањето на клучните статистики поради затворањето на владата може да ги засили аргументите на функционерите да не прават нови промени.

„Пазарот е скап, а скапите пазари бараат пониски камати за да се оправдаат високите вреднувања“, рече Мет Мали од „Милер табак“ (Miller Tabak + Co.). „Со толку многу податоци што пристигнуваат одеднаш, неизвесноста создава страв кај инвеститорите.“

Индексот S&P 500 падна за 1,7 отсто. Nasdaq 100 се намали за 2,1 отсто. Индексите на најголемите технолошки компании и на помалите фирми паднаа за речиси 3 отсто. Индексот на пазарна волатилност на Волстрит се искачи на ниво од 20.

Приносите на десетгодишните државни обврзници пораснаа за пет базични поени, на 4,12 отсто. Доларот ослабе.

Акциите паднаа поради неизвесниот став на Фед
S&P 500 се намали за повеќе од 1 отсто

Bloomberg

Со оглед на тоа што објавувањето на податоците се обновува постепено, трговците и понатаму се соочуваат со „дупка“ во информациите – што значи дека движењата на пазарот повеќе можат да бидат водени од расположението и позиционирањето отколку од конкретните економски сигнали, вели Фавад Разакзада од „Форекс“ (Forex.com).

„Прашањето сега е дали неодамнешниот пазарен ентузијазам ја исцрпи својата сила“, рече тој. „По силниот подем од април наваму, технолошките акции изгледаат сѐ повреднувано, со расположение што се лади поради недостиг од нови поттикнувачи и пауза во економските податоци.“

Во последните неколку сесии, Разакзада забележува изразена ротација на пазарот – трговците се повлекуваат од компаниите со висок раст и се враќаат во одбранбените и вредносните сектори.

„Дали ова е знак дека апетитот за ризик се намалува или само ротација што е вообичаена во здрав пазар во подем? Времето ќе покаже“, рече тој. „Но вреди да се напомене дека продажбата од страна на инсајдери во технолошкиот сектор е зголемена, што ретко е добар сигнал. Трговците треба да останат внимателни.“

Со оглед на тоа што сезоната на финансиски резултати е речиси зад нас, инвеститорите го гледаат овој момент како „добра можност за собирање профит“, додаде Мајкл О'Рурк од „Џонс трејдинг“ (JonesTrading).

„Ова е само нормална пазарна ротација, отстапување од она што функционираше досега“, рече Крис Грисанти од „МАИ капитал“ (MAI Capital Management). „Веројатно е здраво, само што е болно на краток рок.“

Грисанти вели дека сè уште не купува додека пазарот паѓа, но ги следи компаниите што редовно ги има на листата – за можност да купи мал дел од нив ако акциите продолжат да поевтинуваат.

Величествените седум го забавуваат растот

Bloomberg

Паул Тику од „Каламос инвестментс“ (Calamos Investments) вели дека акциите имаа „впечатлив раст од април наваму, без пауза“ и дека тековниот пад може да биде корекцијата што многумина ја очекуваа во октомври – само што таа била одложена поради затворањето на владата.

Тику додава дека би ја искористил секоја слабост на пазарот за да „изгради долгорочни стратешки позиции“.

Инвеститорите земаат дел од профитите кај најголемите технолошки компании по долгиот раст поттикнат од вештачката интелигенција и пренасочуваат капитал кон поразумно вреднувани сектори како индустријата, финансиите, енергетиката и здравството, вели Дејвид Милер од „Каталист фондс“ (Catalyst Funds).

Паралелно, секторите со повисок квалитет и циклични карактеристики бележат засилен интерес, бидејќи инвеститорите се позиционираат за побавно, но стабилно економско опкружување во кое поголема тежина има сигурноста на заработката, а не приказните за хиперраст, додаде Милер.

„Ротацијата надвор од технолошките акции е веројатно најздравиот развој што го видовме годинава“, рече тој. „Она што го гледаме сега е позитивно: инвеститорите повторно ги откриваат деловите од пазарот што беа ставени во сенка од наративот за вештачката интелигенција. Тоа ширење му дава на пазарниот раст многу поцврста основа.“

S&P 500 се спушти под 6.800 поени

Bloomberg

Марк Малек од „Сиберт фајненшал“ (Siebert Financial) вели дека акциите за раст и технолошките гиганти поврзани со вештачката интелигенција ја носеа најголемата тежина во последните месеци и дека проширувањето на учесниците во ценовниот подем е здраво за одржлив пазарен подем.

„Прашањето е дали оваа разлика во перформансите означува почеток на подолг циклус на ротација или пазарот си функционира онака како што знае“, рече тој.

„Не веруваме дека сме во ВИ-меур засега, главно затоа што секојпат кога се активира нов капацитет, тој веднаш се резервира и преполнува“, вели Керол Шлајф од БМО (BMO Private Wealth). „Трошоците за ова досега се доста контролирани, а приказната за ВИ сè уште е во рана фаза.“

Иако некои од учесниците на пазарот се загрижени поради сè поголемата задолженост зад трошоците за вештачка интелигенција, таа додава дека билансите на најголемите технолошки компании се умерено задолжени и имаат простор да ги зголемат изворите на финансирање, што може да вклучува капитал или дури готовина.

Падот кај технолошките акции ја прави заработката на „Енвидија“ (Nvidia Corp.) следната недела поважна од кога било, вели искусниот стратег од Волстрит Луис Навелје. Според него, силната прогноза од извршниот директор Џенсен Хуанг ќе биде клучна за позитивен завршеток на годината на берзата.

Биткоинот потона за 20 отсто од почетокот на октомври
Дигиталната валута падна под 100.000 долари

Bloomberg

Шлајф вели дека очекува пазарите „полека да се движат нагоре – но со продолжена волатилност“. Таа додава дека „механизмите на владата наскоро повторно ќе функционираат“, што е олеснување за пазарите и економијата, но дека и понатаму има голема неизвесност, особено поради пропуштените податоци за инфлацијата и вработувањето и тоа како се одвивале овие сегменти за време на блокадата.

Иако прекинот на податоците ја отежна работата на Фед, таа сепак очекува функционерите да ги намалат каматите следниот месец.

Очекувањата на пазарот за уште едно намалување на каматите во декември паднаа од речиси сигурна можност пред последниот состанок на Фед.

За Дон Ризмилер од „Стратегас“ (Strategas) тоа е важно бидејќи во последно време пристигнуваат загрижувачки индикатори за американската економија, но недостигаат официјални владини податоци што би ја потврдиле вистинската длабочина на слабоста.

„Затворањето на владата заврши, но нарушувањата ќе се чувствуваат со месеци“, рече тој. „Разбирливо е што креаторите на монетарната политика сакаат да се движат внимателно – но тоа остава простор условите на пазарот на трудот во САД дополнително да ослабат во четвртиот квартал.“

Упорно високата инфлација и продолжената слабост на пазарот на трудот создаваат сè поголем раздор меѓу функционерите на Фед околу најдобриот следен чекор за каматите.

„Некои во Фед би сакале да направат пауза во декември и да ги намалат каматите во јануари, надевајќи се дека дополнителните податоци ќе помогнат да се усогласат различните ставови. Но ние не веруваме дека тоа би го решило проблемот. Пауза во декември само ќе создаде повеќе дилеми за Пауел, отколку што ќе реши, и затоа и понатаму сметаме дека најверојатно сценарио е намалување на каматите со построга реторика.“

Bloomberg

Поголема јасност околу состојбата на реалната економија би можела дополнително да го зацврсти аргументот за ново намалување на каматата за четвртина поен, доколку новите податоци покажат понатамошно слабеење на пазарот на трудот и умерена инфлација – две теми за кои дебатите и понатаму се живи, велат Иан Линген, Вејл Хартман и Делани Чои од БМО.

„Иако инвеститорите долго го чекаа обновувањето на протокот на податоци, сепак е веројатно дека претстојните извештаи ќе бидат дочекани со одреден скептицизам поради доцнењата и изменетите временски рокови“, наведуваат тие.

Дополнително, повторното отворање на владата на САД не значи дека протокот на економски податоци веднаш ќе се нормализира, вели Томас Рајан од „Капитал економикс“ (Capital Economics).

„За анкетните податоци што не беа собрани во октомври поради прекинот на финансирањето ќе требаат недели да се соберат, обработат и проверaт. Објавувањето на теренските податоци што недостасуваат, како цените на потрошувачите, веројатно е невозможна задача“, рече тој.

Што се однесува до податоците за ноември, процесот исто така може да потрае, вели Крис Фашијано од КФН (Commonwealth Financial Network). Кога вработените ќе се вратат на работа, ќе има многу краток период за собирање податоци. Неделата на Денот на благодарноста дополнително ќе ги усложни напорите, додаде тој.

„Оваа неизвесност им ја отежнува работата на Федералните резерви, кои и на последниот состанок не беа целосно усогласени околу тоа дали треба ново намалување на каматите во декември“, рече Фашијано.

За инвеститорите, пораката е јасна: „Останете флексибилни“, вели Сима Ша од ПАМ (Principal Asset Management).

„Во услови кога информациите се оскудни, а различните пазарни сили лесно можат да се претворат во силни турбуленции, реакциите на пазарот може да бидат засилени, а флексибилноста на портфолиото е поважна од силното убедување“, додаде таа.