Пауел најави ново намалување на каматите поради слаб раст на вработеноста

Претседателот на Федералните резерви Џером Пауел сигнализираше дека американската централна банка е подготвена да спроведе ново намалување на каматните стапки за една четвртина процентен поен кон крајот на овој месец, иако затворањето на федералната влада значително ја ограничува процената на економските показатели.

Во говорот одржан во вторникот на годишниот состанок на Националната асоцијација за деловна економија (National Association for Business Economics), Пауел изјави дека економските изгледи остануваат непроменети од септември, кога креаторите на политиката ги намалија каматните стапки и проектираа уште две намалувања до крајот на годината.

„Намалувањето во октомври е сигурно“, изјави Џулија Коронардо, основачка на истражувачката компанија „Макрополиси перспективс“ (MacroPolicy Perspectives) и поранешна економистка во Фед. „Ништо не ја променило процената дека сè уште постојат ризици за пазарот на трудот.“

Пауел неколкупати посочи на ниското темпо на нови вработувања и предупреди дека може дополнително да ослаби.

„Во ситуација сме каде што понатамошниот пад на бројот на огласи за работа многу лесно може да се одрази врз невработеноста“, изјави тој за време на сесијата со прашања и одговори. „Имавме неверојатен период на стабилност, но мислам дека наскоро ќе дојдеме до точка кога невработеноста ќе почне да расте.“

Очекувањата за намалување на каматната стапка во октомври останаа речиси непроменети по неговите изјави. Според договорите за идни каматни стапки на федералните фондови, инвеститорите проценуваат речиси 100 отсто веројатност дека ќе има ново намалување.

Септемвриското намалување на каматната стапка на Федералните резерви до целниот опсег од 4 до 4,25 отсто беше првото од декември и следуваше по нагло забавување на вработувањето во текот на летото. Сепак, стапката на невработеност досега останува релативно ниска, зголемувајќи се на 4,3 отсто во август.

Поради тековното затворање на владата, Министерството за труд го одложи објавувањето на извештајот за вработувањата во септември, но повика дел од персоналот за подготовка на податоците за индексот на потрошувачките цени, кој треба да биде објавен во текот на овој месец.

„Во моментов ризиците за пазарот на трудот растат“, изјави Јелена Шулјатјева, виша економистка за САД во „Конференс борд“ (The Conference Board), на маргините на конференцијата на Националната асоцијација за деловна економија (NABE). „Токму тоа ќе биде клучниот фактор за одлуката на краток рок.“

Следната седница на Федералните резерви е закажана за 28 и 29 октомври. Минатиот месец средната вредност на проекциите на 19-те креатори на политиката укажуваше на уште две намалувања до крајот на годината, иако деветмина од нив сметаат дека ќе биде потребно едно или ниту едно дополнително намалување.

Bloomberg

Поделеноста меѓу креаторите на монетарната политика ја прави претпазливоста на Џером Пауел уште поизразена во однос на иднината на каматните стапки, изјави Дајан Свонк, главна економистка во КПМГ (KPMG).

„Тие сигнали укажуваат дека, всушност, не знаеме точно каде се движиме на подолг рок“, рече таа.

Недостигот од целосни официјални економски податоци предизвикува сè поголема загриженост дека Федералните резерви нема да можат јасно да ја проценат состојбата на економијата, што ја зголемува можноста за погрешни одлуки. Ова е особено чувствителен момент за централната банка, чии два главни мандата – стабилност на цените и максимална вработеност – сега се во судир: пазарот на трудот се лади, додека инфлацијата и понатаму е над целта од 2 отсто.

Пауел изјави дека тој и неговите колеги се потпираат на алтернативни, приватни извори на податоци, но нагласи дека владините статистички информации се „златен стандард“.

„Не очекуваме дека ќе можеме целосно да ги замениме податоците што не ги добиваме“, рече Пауел. „Ќе почнеме да чувствуваме недостиг, особено кај октомвриските податоци. Ако ова потрае, податоците дури и нема да се собираат, што ќе го отежни процесот.“

Тој исто така сигнализираше дека централната банка може да го прекине процесот на намалување на билансот на состојба во наредните месеци – важен чекор за одржување на ликвидноста на пазарите за краткорочно финансирање.