Неделата почна со густ црн чад над Скопје. Се запали импровизиран објект во кој се складирал, меѓу другото, и електронски отпад. Епилогот - првичните резултати од мерењето на гасовите во воздухот од примероци земени на денот на пожарот покажуваат зголемување на сите параметри од два до три пати над дозволеното, а јаглерод моноксидот, чија просечна вредност не треба да надминува 10 mg/m3, бил 300 mg/m3. Пред пожарот во Трубарево, скопјани дишеа загаден воздух од пожарите во Вардариште и Дрисла.
Човек брзо се навикнува на сѐ, па дури и на тоа воздухот на има и боја и мирис, штом квадратен метар во загадениот град се продава по цена и до 2.700 евра. Катастарот, конечно, по пет години ги прегледа и ги објави податоците по кои реално се продаваат недвижностите во земјава. Поради високите цени, младите сѐ потешко можат да дојдат до стан, а ние проверивме како може да им помогне Владата. НБРМ веќе излезе со мерки за нивна поддршка, а ние пресметавме што во практика ќе донесат тие.
Глобално, сите очи беа вперени кон Велика Британија, каде што престојуваше американскиот претседател Доналд Трамп. Ова беше втора негова државна посета и, исто како и за време на првата, монархијата го покажа сиот свој луксуз – златни кочии, гарди... Дамите не разочараа – принцезата од Велс со круната на починатата свекрва, принцезата Дијана, и Меланија Трамп со палтото од британскиот бренд. Сепак, не беше сѐ толку гламурозно за Трамп. Некои од Британците незадоволството го искажаа со протести.
Прочитајте повеќе:
Ни требаат безмалку милион евра за да го живееме „американскиот сон“ во Македонија
Непродуктивна вработеност во Македонија, расте и вработувањето на црно
Технолошките гиганти се клучниот елемент во посетата на Трамп на Обединетото Кралство. Тие се обврзаа да помогнат земјата да стане лидер во развојот на вештачката интелигенција во Европа. А уште една компанија од друштвото на величествените влезе во елитниот клуб. Анализиравме што е потребно една компанија да вреди повеќе од три билиони долари?
Но, на кинескиот пазар за нив оди малку потешко. Кина поведе антидампинг-истрага против некои американски чипови, а веднаш потоа беше соопштено дека токму „Енвидија“ ги прекршила правилата за конкуренција во зделка со чипови. Ова се случува додека траат преговорите меѓу САД и Кина за царините и токму во време кога беше постигнат рамковен договор меѓу двете страни за Тикток.
Проблем за Трамп останува и Путин. Американскиот претседател изјави дека е изневерен од рускиот колега и побара сојузниците да престанат да купуваат руска нафта. Тој бара и европските лидери да воведат и санкции кон Кина и Индија, кои трошат руски енергенти, во обид да го стават Кремљ во позиција за завршување на војната во Украина. Трамп и индискиот премиер Моди имаа обид да ги смират тензиите околу царините и руската нафта, во време кога руски танкер се доближуваше до индиско пристаниште.
И каматните стапки беа тема во фокусот неделава. НБРМ ги остави на истото ниво на кое се од февруари годинава, а Фед по цела година ги намали. Овој потег се очекува да му биде ветер во грб на разнишаниот американски пазар на труд. ЕЦБ по последната одлука да ја задржи каматата на 2 отсто, сега ги разгледува сите опции.
Прочитајте повеќе:
Вложивте во македонски граѓански обврзници и депозити? Не заработивте ништо
Фоторобот на „совршениот“ македонски инвеститор – како „играл“ на берзите?
Го анализираме пазарот: Берзите толку се залетани, што инвеститорите почнаа да се плашат
Ги анализиравме и берзите. Нудиме одговор на прашањето зошто S&P расте, а вие губите и како додека францускиот пазар стагнира, еден стартап годинава порасна за 500 проценти.
И уште малку за Трамп, кој врши притисок врз медиумите. Суспензијата на Кимел отвора прашања за слободата на говорот. Друг проблем е неговиот однос кон гувернерката на Фед, Лиза Кук, која сака да ја смени поради, како што вели неговата администрација, хипотекарна измама, иста како што направил и државниот секретар за финансии Скот Бесент.
На источниот фронт, по упадот на руските дронови, Полска активира аларми и борбени авиони поради закана од руски беспилотни летала, а ние проверивме колку се вложува во македонската одбрана. Анализиравме и кои брендови произведуваат дизел-автомобили, кои во Македонија се омилени.
А хрватската компанија „Софтскор“ покажува дека спортот може да биде сериозен бизнис, но и како во овој регион може да се создадат светски приказни. Актуелната епизода во нивниот развој носи влез на најважниот пазар – американскиот. Сè уште се зборува за летниот преоден рок, а најсериозната констатација е дека конечно е потврдена тезата дека приказната за петте најсилни европски лиги е завршена. Денес постои само Англија. По Евробаскетот, остана приказната за новите владетели на европската кошарка.
.webp){kind=icon}
Во моментов нема коментари за веста. Биди прв да коментира...