„Енвидија“ инвестира 2 милијарди фунти во британските „Вејв“ и „Револут“

„Енвидија“ (Nvidia Corp.) планира да инвестира 2 милијарди фунти (2,7 милијарди долари) за поддршка на индустријата за вештачка интелигенција во Велика Британија, во партнерство со неколку фирми за ризичен капитал.

Производителот на чипови ќе го насочи капиталот за, како што се наведува, „овозможување Велика Британија да се натпреварува на глобалниот пазар на вештачка интелигенција“ и ќе соработува со фирмите за ризичен капитал „Аксел“ (Accel), „Ер стрит капитал“ (Air Street Capital), „Балдертон капитал“ (Balderton Capital), „Хокстон венчерс“ (Hoxton Ventures) и „Феникс Корт“ (Phoenix Court), се наведува во соопштението на „Енвидија“ во четвртокот.

Извршниот директор на „Енвидија“, Џенсен Хуанг, на настан во Лондон изјави дека компанијата планира да инвестира во развивачите на технологии за автономни возила „Вејв“ (Wayve) и „Окса“ (Oxa), финтек-компанијата „Револут“ (Revolut) и компании за вештачка интелигенција како „ПолиАИ“ (PolyAI), „Синтезија“ (Synthesia), „Латент лабс“ (Latent Labs) и „Бејскамп рисрч“ (Basecamp Research).

„Вејв“ истовремено соопшти дека „Енвидија“ ќе вложи 500 милиони долари во компанијата за забрзување на развојот и примената на нејзиниот модел за вештачка интелигенција.

Според портпарол на компанијата, вкупната бројка од 2 милијарди фунти ја вклучува и акцијата на „Енвидија“ вредна 500 милиони фунти во британската компанија за дата-центри за вештачка интелигенција „Енскејл“ (Nscale), најавена во средата, а средствата ќе бидат издвоени од билансот на состојбата на „Енвидија“. 

„Енвидија“ соопшти дека нејзините инвестиции ќе бидат „регистрирани во САД и активирани во Велика Британија“, обезбедувајќи им на истражувачите и стартапите пристап до финансирање и компјутерска моќ. Британските партнери за ризичен капитал ќе ѝ помогнат на компанијата да идентификува стартапи за поддршка во областа на вештачката интелигенција, но нема нужно да коинвестираат, рече портпаролот.

„Обединетото Кралство е во идеален момент, кога светски универзитети, храбри стартапи, водечки истражувачи и врвни суперкомпјутери се спојуваат“, изјави Хуанг. „Никогаш немало подобро време за инвестирање во Велика Британија.“

Финансирањето на „Енвидија“ е едно од низата најави поврзани со вештачка интелигенција од американските технолошки компании  неделава, кои се совпаднаа со посетата на претседателот Доналд Трамп на Велика Британија. „Мајкрософт“ (Microsoft Corp.) и „Опен еј-ај“ (OpenAI) исто така најавија инвестиции и партнерства во Велика Британија во вредност од десетици милијарди долари. „Енвидија“ соопшти дека нејзината инвестиција ќе им помогне на британските стартапи во областа на вештачката интелигенција да ги надминат пазарните ограничувања, меѓу кои и пристапот до суперкомпјутери, растечките трошоци за енергија и недостигот од капитал.

Во Велика Британија е седиштето на единицата за вештачка интелигенција на „Гугл“ (Google) – „Дипмајнд“ (DeepMind), како и на стартапи со висок профил, како што е компанијата за софтвер за автономни возила „Вејв“. Иако земјата е најголемиот европски пазар за стартапи според бројот и големината на договорите, сè уште нема создадено национален лидер во областа на вештачката интелигенција сличен на „Опен еј-ај“ во САД или „Мистрал“ (Mistral) во Франција.

„Аксел“, „Балдертон капитал“, „Хокстон венчерс“ и „Феникс Корт“ се меѓу најактивните и најпознати фондови во Лондон и инвестирале во британски стартапи за вештачка интелигенција, како што е случај со „Синтезија“. „Ер стрит капитал“ (Air Street Capital) е помал фонд, поддржан од основачот на „Спотифај“ (Spotify), Даниел Ек, кој е специјализиран за компании од областа на вештачката интелигенција и биотехнологијата.

Хуанг е меѓу лидерите од Силициумската Долина што му се придружија на Трамп за време на неговата посета и во средата присуствуваше на банкет со кралот Чарлс Трети во замокот Виндзор, откако ја објави инвестицијата на „Енвидија“ во „Енскејл“. Овој малку познат стартап, кој произлезе од компанија за крипторударство пред 14 месеци, исто така соработува со „Енвидија“ и „Опен еј-ај“ за лансирањето на „Старгејт Ју-кеј“ (Stargate UK), дел од поширока американска иницијатива за зголемување на капацитетите за работа на системи за вештачка интелигенција.

Овие најави ја зајакнуваат иницијативата на британскиот премиер Кир Стармер за јакнење на врските со САД и поттикнување на растот на технолошкиот сектор. Стармер ја опиша инвестицијата на „Енвидија“ како „големо признание за довербата во Велика Британија и денес и во иднина“.

Во јануари премиерот го претстави својот план за „засилување на вештачката интелигенција“ со инвестиции во дата-центри и чипови. Тој исто така повика на создавање „зони за раст на вештачката интелигенција“, каде што дата-центрите би можеле да добијат забрзано одобрување за градба и пристап до електроенергетската мрежа.