„Опен еј-ај“ и „Енвидија“ ќе најават инвестиции во дата-центри во Британија

Лидерите на „Опен еј-ај“ (OpenAI) и на „Енвидија“ (Nvidia Corp.) ќе најават поддршка за инвестиции од милијарди долари во дата-центри во Велика Британија за време на нивната посета следната недела, која ќе се совпадне со доаѓањето на претседателот на САД, Доналд Трамп, велат добро упатени извори.

Како што посочуваат, двете компании се здружуваат во проектот со лондонската фирма за дата-центри „Енскејл глобал холдингс“ (Nscale Global Holdings Ltd.). 

 

Bloomberg

Извршните директори Сем Алтман од „Опен еј-ај“ и Џенсен Хуанг од „Енвидија“ се дел од делегацијата на американски бизнис-лидери што се очекува да ја посети земјата. Според изворите, „Опен еј-ај“ е подготвена да вложи милијарди долари како дел од планот. Американски компании од различни индустрии ќе објават инвестиции од десетици милијарди долари во Велика Британија за време на посетата на Трамп следната недела, рекле изворите.

Портпаролите на „Енвидија“ и на „Опен еј-ај“ одбија да коментираат. Претставници на Белата куќа и „Енскејл“ не одговорија веднаш на барањата за коментар.

Европските политички и бизнис-лидери постојано повикуваат на поголеми инвестиции во капацитети за поддршка на генеративната вештачка интелигенција, предупредувајќи на ризик од забавување на растот и препуштање на технологијата на САД и Кина.

Во јануари британскиот премиер Киер Стармер најави план за „турбо полнење на ВИ“ преку вложувања во дата-центри и чипови. Тој исто така побара создавање „зони за раст на ВИ“ во кои дата-центрите ќе добиваат забрзани одобренија за градба и пристап до електричната мрежа.

Bloomberg

„Опен еј-ај“, креаторот на ЧетГПТ (ChatGPT), има намера да ги прошири своите комерцијални активности во Европа, каде што се соочува со значително построги регулативи и поголем скептицизам кон технологијата отколку во Силициумската Долина. Во мај компанијата го претстави планот „OpenAI for Countries“, за проширување на нејзиниот водечки проект за дата-центри „Старгејт“ (Stargate) во странство. Во јули компанијата најави дека ќе биде главен клиент на нов дата-центар во Норвешка, којго гради „Енскејл“ (Nscale) со средства од норвешкиот инвеститор „Акер АСА“ (Aker ASA).

„Енскејл“, кој стартуваше во мај 2024 година, претходно вети дека ќе инвестира 2,5 милијарди долари во британската индустрија за дата-центри во рок од три години, вклучувајќи и купување земјиште во Лотон, Есекс. Кога во јануари го најави проектот во Лотон, компанијата соопшти дека објектот може да смести до 45.000 суперчипови GB200 на „Енвидија“, дизајнирани за ВИ. Тогаш не откри кој ќе биде клиент на центарот.

Во април „Енскејл“ бараше да обезбеди 2,7 милијарди долари за изградба на ВИ-инфраструктура, потпирајќи се на претстојното партнерство со „Бајтденс“ (ByteDance Ltd.), објави тогаш „Блумберг“.

Инвестициите на „Опен еј-ај“ во Европа се многу помали во споредба со нејзините активности на други места, вклучувајќи го и ветувањето за изградба на капацитет од 5 гигавати во првиот меѓународен центар во Обединетите Арапски Емирати. Американскиот проект „Старгејт“ има за цел капацитет од 4,5 гигавати, објави претходно „Блумберг њуз“. За таа иницијатива, „Опен еј-ај“ и нејзините партнери, меѓу кои „Софтбанк“ (SoftBank Group Corp.) и „Оракл“ (Oracle Corp.), ветија дека ќе вложат и до 500 милијарди долари.

Во моментов нема коментари за веста. Биди прв да коментира...

Остави коментар