Трамп поддржува нови санкции, ама кога НАТО ќе престане да купува руска нафта

Американскиот претседател Доналд Трамп изјави дека е подготвен да воведе „големи“ санкции врз руската нафта доколку земјите од НАТО го сторат истото.

Трамп, еден ден откако изјави дека го губи трпението со рускиот претседател Владимир Путин поради војната во Украина, изјави дека е „подготвен да воведе големи санкции врз Русија кога сите земји од НАТО ќе се согласат и ќе почнат да го прават истото и кога сите земји од НАТО ќе престанат да купуваат нафта од Русија“, напиша Трамп во објава на Трут сошал.

Многу европски земји намалија или престанаа да купуваат руска нафта, но неколку сојузници на НАТО - вклучувајќи ја и Унгарија - ги блокираа построгите предлози на Европската Унија насочени кон енергетскиот сектор на Русија.

„Блумберг“ во петокот објави дека САД планираат да ги повикаат сојузниците од Г-7 да воведат тарифи до 100 проценти врз Кина и Индија заради тоа што тие земји купуваат руска нафта - дел од напорите да го убедат Путин да ја прекине инвазијата на Русија врз својот сосед.

„Ова, плус НАТО, како група, која воведува царини од 50 до 100 проценти за Кина, кои целосно ќе се повлечат по завршувањето на војната на Русија и Украина, исто така ќе биде од голема помош и ќе придонесе за крај на оваа смртоносна, но смешна војна“, напиша Трамп.

Тој понекогаш употребуваше помек тон кон Кина, иако продолжува да инсистира на средба со претседателот Шји Џјинпинг и трговски договор со втората по големина економија во светот. И секој потег за воведување санкции врз Кина веројатно би предизвикал силен одмазднички одговор од Пекинг и би го нарушил примирјето во трговската војна меѓу САД и Кина.

Американскиот министер за финансии, Скот Бесент, и трговскиот претставник на САД, Џејмисон Грир, во наредните денови треба да се сретнат со кинески претставници во Мадрид. Министрите за финансии на Г-7 за време на состанокот во петокот разговараа за тоа како да го зголемат притисокот врз Русија.

Досега Трамп се спротивставуваше на додавањето нови санкции врз Русија додека водеше мировни разговори со Путин. Но, по одржувањето на состанокот со Путин во Алјаска, кој не донесе никаква пауза во воените операции на Русија во Украина, Трамп не успеа да организира трилатерална средба со украинскиот претседател Володимир Зеленски.

Во последните денови има сè повеќе знаци дека трпението на Трамп со Путин се намалува, особено со Русија која спроведе неколкудневни драматични воздушни напади во Киев по состанокот во Алјаска.

„Како што знаете, посветеноста на НАТО кон крај на војната беше далеку помала од 100 проценти, а купувањето руска нафта, според некои, беше шокантно! Тоа значително ја ослабува вашата преговарачка позиција и моќта за преговарање со Русија“, додаде тој.

Унгарскиот претседател Виктор Орбан, сојузник на Трамп, кој исто така одржува блиски врски со Путин, покажа мала подготвеност да го промени своето противење на санкциите врз руската нафта. Земјата има договор со рускиот „Газпром“ за 4,5 милијарди кубни метри годишно што важи до 2036 година, а кој е зголемен со дополнителни купувања од 2022 година.

Во моментов нема коментари за веста. Биди прв да коментира...

Остави коментар