И секретарот за финансии на Трамп земал кредити со контрадикторни документи

Американскиот секретар за финансии Скот Бесент претходно тврдел дека користи две различни куќи како своја „главна резиденција“ во исто време, покажуваат документите за хипотека — ист вид противречни тврдења какви што претседателот Доналд Трамп ги користи за да се обиде да ја отстрани гувернерката на Федералните резерви Лиза Кук.

Противречните договори на Бесент го обврзувале во 2007 година истовремено да живее во домови во Њујорк и Масачусетс како во свои главни резиденции. Но, експертите за хипотеки велат дека нема знаци за неправилности од негова страна. Напротив, неговиот случај покажува дека несогласувањето во документите за заем на дом не е нужно доказ за измама.

Други докази од хипотеките на Бесент покажуваат дека неговиот заемодавач, „Бенк оф Америка“, не се потпирал на тие ветувања и никогаш не очекувал тој навистина да живее во двата домови како во примарни резиденции.

Ситуацијата на Кук изгледа слично. Таа во 2021 година потпишала документи за хипотека за куќа во Мичиген и стан во Атланта, ветувајќи дека и двата ќе бидат нејзина примарна резиденција во наредната година. Двата договора, со различни кредитни унии, биле услов за да добие кредити за недвижностите, во износ од 203.000 и 540.000 долари. Но, документот што го доби „Блумберг Њуз“ покажува дека заемодавецот за недвижноста на Кук во Џорџија не очекувал таа да живее таму постојано. Процена на заемот, издадена од кредитната унија неколку недели пред таа да ја добие хипотеката, го опишува имотот како „викендичка“.

Во писмо од минатиот месец со кое ѝ соопштил дека е разрешена, Трамп навел дека нејзините противречни ветувања за хипотеки биле доволна причина да ја отстрани од Одборот на Федералните резерви, нарекувајќи ги „потенцијално кривично дело“ или барем доказ за „тешка негрижа“. Овој потег доаѓа во момент кога Трамп се обидува да воспостави подиректна контрола врз Фед оваа година, жалејќи се дека не ги намали каматните стапки доволно брзо. Кук ја оспори нејзината смена на суд, каде што тврди дека обвинувањата против неа се лажни.

Во понеделникот, федерален апелациски суд ѝ дозволи на Кук засега да продолжи со работа — одлука на која Белата куќа најави жалба. Кук присуствуваше на состанок за монетарна политика на Фед во вторникот. Белата куќа не одговори на барањето за коментар.

Противречните хипотекарни договори на Кук барем во некои аспекти се слични на оние што Бесент, назначен од Трамп, ги склучил пред години. На 20 септември 2007 година, тој се согласил дека куќата со седум соби во џорџијански стил, која ја купувал во Бедфорд Хилс, Њујорк, ќе му биде „главна резиденција“ во наредната година. На истиот ден, исто такво ветување дал и за куќа на плажа во Провинстаун, Масачусетс. Двата договора ги потпишал адвокатот Чарлс Рич, кој имал полномошно да потпишува во име на Бесент.

Документ за хипотека поднесен во канцеларијата на окружниот нотар во округот Вестчестер, Њујорк, датиран од 20 септември 2007 година, и потпишан од адвокатот на Скот Бесент во негово име, се однесува на имот во Бедфорд Хилс.

Хипотеките биле обезбедени од истиот заемодавач, „Бенк оф Америка“, како дел од поголемо финансирање од 21 милион долари обезбедено со двата имоти и друга имотна сопственост. Како одговор на прашањата од „Блумберг“, претставниците на Бесент доставија изјава од „Бенк оф Америка“ во која банката потврдува дека имала „разбирање и согласност дека имотите во Бедфорд и Провинстаун се секундарни резиденции“.

Рич, адвокатот кој ги потпишал договорите во име на Бесент, напиша: „Банката беше целосно свесна дека имотот во Провинстаун (Масачусетс) не е главна резиденција и се откажа од какво било барање да се користи како таква. Апсолутно немаше ништо неправилно во апликациите за заем на г. Бесент, во кои тој беше минимално вклучен, бидејќи ми ја делегираше надлежноста.“

Бесент беше прашан за потегот на претседателот против Кук за време на гостување на „Фокс бизнис нетворк“ минатиот месец. „Има луѓе кои мислат дека претседателот Трамп врши прекумерен притисок врз Фед“, рече тој. „А има и луѓе како претседателот Трамп и јас, кои мислат дека ако некој функционер на Фед извршил хипотекарна измама, тоа треба да се испита и дека тој не треба да служи како еден од водечките финансиски регулатори во земјата.“

Алекс Спиро, адвокат на Бесент, рече дека не може да коментира како ситуацијата на Кук се споредува со онаа на Бесент, бидејќи не ги разгледал детално околностите околу Кук.

По објавувањето на овој напис, Спиро додаде следен коментар: „Пред речиси 20 години, адвокатите на г. Бесент правилно ја пополнија документацијата, банката потврди дека тоа е направено правилно, а овој бесмислен напис доаѓа до заклучок дека сето тоа е направено правилно.“

Ситуациите со хипотеките на Бесент и Кук не се идентични. Хипотеките на Бесент се стари речиси две децении и биле потпишани од неговиот адвокат, додека Кук своите ги потпишала лично и се многу понови. Бесент бил богат хеџ-фонд менаџер, што сигнализира дека немал проблем да добие кредити. И бидејќи двете хипотеки на Бесент биле со иста банка и потпишани на ист ден, заемодавачот немал начин да биде доведен во заблуда дека тој планира да живее на друго место. Хипотеките на Кук биле со различни банки и склучени на различни датуми.

Сепак, остануваат сличности. Двајцата формално се согласиле да живеат во два различни дома како главна резиденција во исто време. И двајцата имаат докази дека тоа несогласување не било измамничко и дека банкарите биле свесни за плановите за недвижностите. Проблемот за администрацијата на Трамп не е во неправилноста од страна на секретарот за финансии, туку во двојните стандарди, предизвикани од одлуката на претседателот да ја искористи техничката точка околу „главната резиденција“ за да се обиде да отстрани противник.

Бил Пулт, назначен од Трамп за раководител на Федералната агенција за финансии на домувањето, му даде на претседателот причина да ја отпушти Кук кога минатиот месец ја обвини за потенцијална хипотекарна измама на социјалната мрежа X. Таа е една од тројцата противници на претседателот кои Пулт ги пријавил кај обвинителите на Министерството за правда за истраги за хипотекарна измама. Другите се државниот обвинител на Њујорк, Летиција Џејмс, и сенаторот Адам Шиф, демократ од Калифорнија. Сите тројца ги негираат обвинувањата за хипотекарна измама.

Во саботата, откако „Ројтерс“ прв ја објави информацијата дека документ покажува оти заемодавачот на Кук очекувал имотот во Џорџија да биде викендичка, Пулт тврдеше дека тоа не прави никаква разлика. „Д-р Кук самата се претставува како исклучително успешен финансиски оператор“, напиша Пулт на социјалната мрежа X. „Ако д-р Кук побарала процени како за викендичка, а потоа склучила договор за хипотека како за главна резиденција, тоа е крајно загрижувачко и, според мое мислење, претставува понатамошна намера за измама#.

Bloomberg

Бесент е еден од најмалку двајцата членови на кабинетот на Трамп кои дале противречни ветувања за живеење во дом, слични на оние на Кук. Лори Чавез-Деремер, секретарката за труд, во јануари 2021 се согласила да остане во својот долгогодишен дом во Орегон во текот на следната година како услов за добивање хипотека. Потоа во март дала слично ветување дека ќе живее во имот во Аризона кој го купувала. Во јули поднела кандидатура за место во Претставничкиот дом како жител на Орегон. „Прорепублика“ извести за хипотеките на Чавез-Деремер претходно овој месец.

Чавез-Деремер имала намера Аризона да ѝ биде главна резиденција кога ја зела хипотеката таму, но подоцна се предомислила кога ѝ било предложено да се кандидира за Конгресот, изјави нејзината портпаролка Кортни Парела во имејл. Таа додаде дека Чавез-Деремер постапила согласно законот. „Ова е измислена приказна за напад врз администрацијата на Трамп“, рече таа.

Клаузулите за живеење во сопствен дом се стандардни делови на договорите за станбени хипотеки. Заемодавачите понекогаш нудат подобри услови за главни резиденции, како пониски каматни стапки или барања за аванс, бидејќи луѓето имаат поголема веројатност да ги враќаат заемите за домовите во кои навистина живеат. Ако некој го измами заемодавачот за тоа дали планира да живее во недвижноста, тоа може да биде хипотекарна измама, иако кривични прогонства се ретки.

Ниту случајот на Кук ниту на Бесент не звучат како измама, бидејќи плановите на заемопримачите да ги користат имотите како секундарни домови биле откриени пред заемодавачот, вели Даглас Милер, адвокат за недвижности од „Екселсиор“, Минесота, кој сведочел пред Конгресот за пазарот на хипотеки. „Ако заемодавачот знаел, а апликацијата за хипотека го покажува тоа, тешко ми е да најдам вина кај потрошувачот“, рече тој.

Милер изјави дека клаузулата за живеење во сопствен дом е стандарден дел од американските хипотеки, а вообичаениот начин за да се откаже ова барање за втори домови е да се приложи дополнителен документ, познат како анекс за втор дом. Можно е во случаите на Кук и Бесент едноставно некој да заборавил да го приложи тој образец, додаде тој. „Во еден момент мора да се потпреш на фактот дека си го открил тоа пред заемодавецот, а ако тие пропуштиле образец, вината е кај нив“, рече тој. „Сето ова е пренадувано.“

Во поднесок поднесен минатиот месец како дел од тужбата со која ја оспорува својата смена, Кук ја спомена можноста дека административна грешка довела до нејзините противречни тврдења за живеење, но додаде дека дури и ако направила нешто погрешно пред да се приклучи на Фед, тоа не може да биде основа за нејзино отстранување. Претставниците на Кук одбија да коментираат за „Блумберг“.

„Немам намера да бидам изнудена да поднесам оставка поради некакви прашања подигнати во твит“, рече Кук во изјава минатиот месец.

Во моментов нема коментари за веста. Биди прв да коментира...

Остави коментар