Три банкарски измами ја разнишаа довербата на Волстрит

Во споредба со колапсот на „Фрст брендс“ (First Brands Group) и „Триколор“ (Tricolor Holdings), загубите што ги открија регионалните банки „Ционс“ (Zions Bancorp) и „Вестерн“ (Western Alliance Bancorp) изгледаат мали – во износ од „само“ неколку десетици милиони, а не милијарди долари.

Сепак, последователното откривање измами со заеми повторно ја разгоре дебатата на Волстрит за тоа дали ерата на лесен капитал конечно ќе донесе последици и за банките и за небанкарските институции.

Во случајот на „Ционс“ и „Вестерн“, наводните сторители се исти: инвестициски фондови поврзани со Ендрју Стапин и Џералд Марсил, заедно со други страни, кои ги позајмиле средствата за да ја финансираат својата набавка на проблематични комерцијални хипотекарни заеми.

Според тужбата поднесена од „Ционс“, нејзината подружница „Калифорнија банк“ (California Bank & Trust) одобрила заем од 60 милиони долари, а истрагата открила дека многу од записите и основните недвижности им биле префрлени на други субјекти – наводи што адвокатот на Стапин и Марсил „енергично ги негира“.

Овие откритија се надоврзуваат на други неодамнешни финансиски шокови, вклучувајќи го и банкротот на „Триколор“, компанија што даваше кредити за купување автомобили што им се одобруваат на клиенти со низок кредитен рејтинг. Веднаш потоа следуваше и колапсот на „Фрст брендс“, производител на автомобилски делови со долг од над 10 милијарди долари кон некои од најголемите имиња на Волстрит.

Иако „Ционс“ и „Вестерн“ пријавија релативно мали загуби од наводната измама, реакцијата на инвеститорите беше многу посериозна: 74 од најголемите американски банки во текот на вчерашниот ден изгубија повеќе од 100 милијарди долари пазарна вредност.

„Ова е сектор во кој инвеститорите – особено оние што се нови во оваа индустрија – имаат тенденција прво да продаваат, а потоа да поставуваат прашања“, наведоа аналитичарите на „ЏП Морган“ во белешка до клиентите. Аналитичарите Ентони Елијан и Мајкл Пјетрини сепак изразија загриженост „бидејќи сите овие кредитни инциденти се случуваат во многу краток период“.

Адвокатот Брендон Тран, кој ги застапува Стапин и Марсил, изјави дека обвинувањата против неговите клиенти се „неосновани“ и погрешно ги претставуваат фактите.

„Уверени сме дека откако ќе бидат презентирани сите докази, нашите клиенти целосно ќе бидат ослободени од вина“, изјави Тран.

Претставниците на „Вестерн“ и „Ционс“ одбија да коментираат.

Главниот извршен директор на „ЏП Мрган“, Џејми Дајмон, во вторникот – пред последниот бран откритија – изјави дека инвеститорите треба да бидат „внимателно предупредени“ дека е можно да следуваат уште кредитни проблеми.

„Кога ќе видите една бубашваба, веројатно има уште“, рече тој, откако банката ги објави резултатите за третиот квартал и го обелодени ударот од 170 милиони долари поради „Триколор“.

„Сите треба да бидат предупредени во врска со ова.“

Големите банки, како неговата, релативно лесно можат да апсорбираат отписи од такви размери, но сумите се многу позагрижувачки за помалите, од кои некои беа погодени од сопствена криза пред помалку од три години.

„Ционс“ потона за 13 отсто – најголем пад во последните шест месеци – откако откри отпис од 50 милиони долари за заемот што го одобрила нејзината подружница „Калифорнија банк“. „Вестерн“ исто така се намали за 11 отсто, откако соопшти дека им одобрила кредити на истите должници.

Сепак, имаше и знак дека раководните лица во банкарскиот сектор веруваат дека проблемот може да биде ставен под контрола и да не се проширува понатаму. Во третиот квартал банките издвоиле значително помалку средства за покривање на можните идни лоши кредити, што покажува дека не очекуваат поголема криза.

Додека „ЏП Морган“ го зголеми својот резервен фонд на 3,4 милијарди долари, неговите пет најголеми конкуренти заедно издвоиле најмалку пари во последните две години. Една од нив, „Морган Стенли“, воопшто не издвоила дополнителни средства.