Директорски смени во врвот на „НЛБ банка“ во Скопје

Бојан Стојаноски, Драгиша Тадиќ и Кирил Бухов ќе бидат нови членови на Управниот одбор на „НЛБ банка“, откако Надзорниот одбор на банката вчера донесе одлуки за нивно именување. Катерина Јанковиќ, која е членка на Управниот одбор, доби нови мандат, а Надзорниот одбор, како што соопштија од банката, го утврдил предлогот за зголемување на бројот на членови на Управниот одбор на банката од досегашните четири на пет члена.

На Стојаноски, Тадиќ и Бухов мандатите во УО им почнуваат од 1 јануари 2026 година, кога ќе им престане функцијата во одборот на Петер Зелен и на Игор Давчевски. Од „НЛБ банка“ велат дека Јанковиќ е реизбрана за нов четиригодишен мандат во одборот, за која соопштуваат дека е докажана финансиска експертка, со повеќе од две децении банкарско искуство во областа на корпоративното и малопродажното банкарство.

„Новоименуваните лица официјално ќе ги преземат функциите, членови на Управниот одбор на банката, по добивање согласност од Народната банка за именување членови на Управниот одбор на НЛБ банка Скопје“, се наведува во соопштението.

Бојан Стојаноски доаѓа на функцијата во „НЛБ банка“ од конкурентската „Стопанска банка“, каде што од 2020 година беше член на Управниот одбор и генерален директор за управување со ризици, а од каде што поднесе оставка пред извесно време. Тој е банкарски експерт со над 20 години искуство на високи раководни позиции во банкарскиот сектор

Драгиша Тадиќ доаѓа од „НЛБ Комерцијална банка Белград“, од позицијата извршен директор за кредитни ризици, која ја извршувал и во периодот помеѓу 2015 и 2020 година. Од 2020 до 2022 година тој е помошник на Управниот одбор на „Комерцијална банка Белград“. Неговото искуство е поврзано и со лизинг-операции. Тадиќ моментално е член на Надзорниот одбор на „НЛБ лиз & го Белград“.

Кирил Бухов му се приклучил на тимот на „НЛБ банка Скопје“ во јануари годинава како помошник на Управниот одбор. Професионалната кариера ја започнува во областа на телекомуникациите во 2001 година, а во банкарството преминува во 2006 година. До 2017 година работи во „Халкбанк“ АД Скопје, каде што напредува до позицијата директор на секторот за информациски системи. 

Во моментов нема коментари за веста. Биди прв да коментира...

Остави коментар