„ЏП Морган“ ги надмина процените за кварталните приходи

„ЏП Морган Чејс“ (JPMorgan Chase & Co.) во третиот квартал ги надмина процените на аналитичарите за надоместоците за тргување и инвестициско банкарство, поттикнати од зголемувањето на склучувањето зделки и процена на ризик во услови на продолжена нестабилност поврзана со царините на американскиот претседател Доналд Трамп.

Најпрометниот квартал за иницијални јавни понуди (ИПО) од 2021 година помогна во зголемувањето на надоместоците за инвестициско банкарство за „ЏП Морган“ од 16 проценти, додека приходите од пазарите се искачија за 25 отсто. За разлика од оствареното, се предвидуваше дека овие сегменти ќе се зголемат за 11 и 17 проценти, соодветно.

„Иако има некои знаци на омекнување, особено во растот на работните места, американската економија генерално остана отпорна“, наведе главниот извршен директор Џејми Дајмон во соопштението. „Сепак, продолжува да постои зголемен степен на неизвесност што произлегува од сложените геополитички услови, царините и трговската неизвесност, зголемените цени на активата и ризикот од леплива инфлација.“

Оваа претпазлива прогноза се одрази преку зголемувањето за 810 милиони долари на купот пари што банката ги издвои за потенцијално проблематични кредити, повеќе отколку што очекуваа аналитичарите. Поголемиот дел од тоа беше поврзано со услугите со картички, а како објаснување на тоа зголемување банката ги наведе растот на кредитите и „ажурирањата на одредени макроекономски варијабли“.

Квалитетот на кредитите овој квартал е особено во фокус за инвеститорите по двата високопрофилни банкрота во автомобилскиот сектор. „ЏП Морган“ е меѓу банките што се соочуваат со загуби поврзани со „Триколор холдингс“ (Tricolor Holdings), објави „Блумберг“ минатиот месец. Во рамките на комерцијалната и инвестициска банка, фирмата зеде 567 милиони долари нето-отписи, делумно поради „тоа што се чини дека се неправилности поврзани со заемопримателите во одредени обезбедени кредитни линии“.

Најголемата американска банка денеска ги објави резултатите за третиот квартал, заедно со „Велс Фарго“ (Wells Fargo & Co.), „Голдман Сакс“ (Goldman Sachs Group Inc.) и „Ситигруп“ (Citigroup Inc). Извештаите на конкурентите, Банката на Америка“ (Bank of America Corp.) и „Морган Стенли“ (Morgan Stanley), се закажани за среда.

Приходите на „ЏП Морган“ од пазарите се искачија на 8,94 милијарди долари, додека надоместоците за инвестициско банкарство се зголемија на 2,63 милијарди долари, проследени со скок од 53 проценти во процената за ризик на акции.

Резултатите на „ЏП Морган“ ги надминаа и сопствените прогнози од почетокот на септември, кога долгогодишниот извршен директор Даг Петно рече дека приходите од тргување би можеле да се зголемат за процент меѓу 17 и 19, додека надоместоците за инвестициско банкарство би можеле да се зголемат за околу 10-12 проценти.

Тргувањето со акции во третиот квартал скокна за 33 проценти, на 3,33 милијарди долари, додека фиксниот приход се зголеми за 21 отсто. Надоместоците за осигурување долгови и советување за спојувања и преземања пораснаа за девет отсто.

Акциите на „ЏП Морган“ годинава, заклучно со вчера, пораснаа за 28 проценти, малку се променија во раното тргување во Њујорк.

Нето-каматниот приход од 24 милијарди долари беше малку под очекувањата од 24,1 милијарди долари. „ЏП Морган“ ги зголеми своите прогнози за нето-приходите од камати за целата година на околу 95,8 милијарди долари од околу 95,5 милијарди долари колку што процени во јули.

Што се однесува до трошоците, банката потроши 24,3 милијарди долари во кварталот и изјави дека очекува приспособените трошоци за целата година да изнесуваат околу 95,9 милијарди долари, што е зголемување во однос на 95,5 милијарди долари прогнозирани во јули.