„ЏП Морган“ ќарува од хаосот што го прави Трамп

Трговците со акции за сметка на „ЏП Морган“ (JPMorgan Chase & Co.) постигнаа рекордни приходи во првиот квартал, потпомогнати од хаотичните движења на пазарот поради потезите на претседателот Доналд Трамп по неговото повторно стапување на функцијата во јануари.

Најголемата американска банка го зголеми приходот од тргување со акции за 48 отсто, достигнувајќи 3,81 милијарди долари, со што ги надмина очекувањата на аналитичарите, како и сопствениот рекорд од тргување со акции поставен пред четири години. Сепак, извршниот директор Џејми Дајмон во изјавата објавена во петокот заедно со резултатите изрази претпазливост во однос на перспективите за американската економија.

„Економијата се соочува со значителни турбуленции (вклучувајќи ги и геополитичките), со потенцијални позитивни ефекти од даночната реформа и дерегулацијата, но и потенцијални негативни ефекти од царините и ‘трговските војни’, упорната инфлација, високите фискални дефицити и сѐ уште доста високите цени на средствата и нестабилноста“, наведе Дајмон во изјавата.

Најголемата американска банка додаде 973 милиони долари на резервите за лоши кредити, многу повеќе од 290 милиони долари што ги предвидуваа аналитичарите. Ова зголемување на резервите е последен знак дека компаниите низ Америка се подготвуваат за економски пад додека извршните директори се обидуваат да се справат со царинската политика на претседателот Трамп, која се менува секојдневно.

Акциите на „ЏП Морган“, кои годинава до четвртокот беа намалени за 5,3 отсто, се зголемија за 2,6 отсто во раното тргување во Њујорк во петокот.

Резултатите на „ЏП Морган“, заедно со оние на „Морган Стенли“ (Morgan Stanley) и „Велс Фарго“ (Wells Fargo & Co.), даваат увид во тоа како најголемите американски банки се снаоѓаат во раните денови од вториот мандат на Трамп. Инвеститорите се исто така заинтересирани за детали за американската економија од извршни директори чии компании опслужуваат голем дел од американските потрошувачи и бизниси.

Во своето годишно писмо до акционерите објавено во понеделникот, Дајмон побара брзо решение за неизвесностите предизвикани од царините, предупредувајќи дека некои од негативните ефекти се влошуваат со текот на времето и тешко се отстрануваат. Пазарите паднаа по објавата на Трамп за царините на 2 април, предизвикувајќи загриженост за рецесија од високи менаџери во финансискиот сектор и пошироко.

Извршниот директор Џејми Дајмон сепак е  претпазлив во однос на перспективите за американската економија. Фото: Bloomberg

 

Дајмон се приклучи на предупредувањата на „Фокс бизнис“ (Fox Business) во средата, изјавувајќи дека рецесија е „веројатен исход“. Трамп го гледал интервјуто, а во текот на истиот ден објави 90-дневна пауза на царините за одредени земји. Оваа најава го предизвика најдобриот ден за S&P 500 од 2008 година.

Турбуленциите на пазарот досега ја кочат експанзијата на инвестициското банкарство што ја предвидуваа менаџерите од финансискиот сектор по изборот на Трамп. Провизиите од инвестициско банкарство на „ЏП Морган“ пораснаа за 12 отсто во првиот квартал, при што советувањето и издавањето обврзници пораснаа за 16 отсто, додека издавањето акции опадна за 9 отсто.

Вкупниот приход од тргување порасна за 21 отсто, при што успехот кај акциите се должи на „особено силното работење со комплексните финансиски инструменти при зголемена нестабилност“, се наведува во соопштението на банката. Трговците со обврзници остварија приход од 5,85 милијарди долари, што е зголемување од 8 отсто во однос на минатата година, но под очекувањата на аналитичарите.

Нето-приходите од камати достигнаа 23,3 милијарди долари во кварталот, што е за 1 отсто повеќе од претходната година. Банката соопшти дека сега очекува да заработи околу 94,5 милијарди долари во нето-камати годинава, повеќе од насоките од околу 94 милијарди долари од јануари.

Што се однесува до трошоците, „ЏП Морган“ ја потврди претходната прогноза дека очекува приспособените годишни расходи да изнесуваат околу 95 милијарди долари. Во првиот квартал расходите без камати беа 23,6 милијарди долари — под процените на аналитичарите.

Резултатите исто така вклучуваат добивка од 588 милиони долари поврзана со „Фрст рипаблик“ (First Republic), која „ЏП Морган“ ја презеде пред речиси две години на државна аукција по пропаѓањето на оваа банка од Калифорнија. „ЏП Морган“ соопшти дека во јануари постигнала договор со Федералната корпорација за осигурување депозити (FDIC) „во врска со одредени отворени прашања“ поврзани со аквизицијата.

Во моментов нема коментари за веста. Биди прв да коментира...

Остави коментар