Банките на Волстрит беа оптимисти дека вториот мандат на Доналд Трамп ќе донесе бум во склучувањето договори. Наместо тоа, тој донесе трговски бум.
Приходите од тргување во првата половина од годината кај петте најголеми банки скокнаа за 10 милијарди долари во споредба со лани и достигнаа рекордно ниво, при што царините и даночната политика предизвикаа пораст на активноста во пазарите на акции, валути и обврзници. Во меѓувреме, приходите од инвестициското банкарство се зголемија за помалку од милијарда долари и сè уште се речиси 40 отсто под нивото од 2021 година, бидејќи истата таа нестабилност негативно влијаеше врз обемот на спојувања и јавни понуди (ИПО).
„По 'Денот на ослободувањето', видовме голема нестабилност на пазарот,“ изјави Џим ДеМаре, претседател на глобалните пазари во „Банка на Америка“ (Bank of America), во интервју. „Имаше многу клиентска активност, а откако се намали загриженоста, пазарот се консолидираше. Потоа следеше репозиционирање во акциите, каматните стапки и девизниот пазар.“
Bloomberg
Кога Трамп победи на изборите во ноември минатата година, извршните директори на Волстрит веруваа дека неговата програма за раст ќе ја ослободи потисната побарувачка за договори по долг период на застој. Шефот на „ЏП Морган“ (JPMorgan Chase), Џејми Дајмон, тогаш изјави дека банкарите „играле по улиците“ поради победата на Трамп, додека тој и други финансиски лидери предвидуваа враќање на „животинскиот дух“ на пазарот. Но, дрските царински политики на Трамп го ставија тоа во мирување, ладејќи ја активноста околу спојувањата додека немирите ја тресеа пазарната средина.
Иако нестабилноста предизвикана од т.н. „Ден на ослободување“ на Трамп во почетокот на април ги спречи договорите, таа дополнително ја поттикна трговската активност во вториот квартал, генерирајќи рекордни приходи за некои од најголемите банки на Волстрит. Трговците на „Банка на Америја“ остварија рекорд за вториот квартал, додека акциските трговци на „Голдман Сакс“ (Goldman Sachs) остварија највисок приход во историјата на Волстрит. Акциските трговци на „Морган Стенли“ (Morgan Stanley) имаа најсилен втор квартал досега, а трговската дивизија на „Ситигруп“ (Citigroup) го имаше најдобриот резултат за тој период во последните пет години, при што извршната директорка Џејн Фрејзер изјави дека нестабилноста ќе биде „карактеристика, а не грешка, на новиот светски поредок.“
Зголемена активност
Вкупниот приход од тргување кај петте најголеми банки достигна 71 милијарда долари во првите шест месеци — најмногу досега за тој период. ДеМаре од „Банка на Америка“ изјави дека очекува активноста да остане висока — иако не толку колку што беше кога првпат беа најавени царините.
„Но овој последен период, последниве 12 месеци, во споредба со пред-ковид периодот, е многу различна економска и политичка околина,“ рече тој. Одделот за фиксен приход на „Банка на Америка“ забележа најмногу активност кај макро-производите како каматни стапки и девизи. Кај акциите, трговците работеа со раст на кеш и дериватни производи.
Извршниот директор на „Голдман Сакс“, Дејвид Соломон, во интервју за „Си-ен-би-си“ (CNBC) изјави дека активноста што ја поттикнува нивната трговија со акции „делува одржливо“ со растот на пазарот и економијата.
„Не би рекол дека ќе ја видиме истата нестабилност од почетокот на кварталот и во втората половина, но клиентите се активни,“ рече Соломон. Тој додаде дека и спојувањата и јавните понуди се зголемуваат, што е „добро и за трговскиот бизнис со акции.“
Резултатите од вториот квартал на банките покажаа знаци на закрепнување. Инвестициските банкарски услуги на „ЏП Морган“ остварија изненадувачки раст во вториот квартал, со 7 отсто зголемување на провизиите, при што Дајмон изјави дека активноста добива замав. Во „Ситигруп“, инвестициските банкарски приходи скокнаа повеќе од очекуваното — за 13 отсто во споредба со истиот квартал минатата година, надминувајќи милијарда долари.
Извршниот директор на „Морган Стенли“, Тед Пик, рече дека во јуни дошло до обновување на инвестициската банкарска активност, бидејќи „управните одбори се чини дека полесно ја прифаќаат тековната неизвесност“. Иако нивните такси од инвестициско банкарство паднаа за 5 отсто на 1,54 милијарди долари, падот беше помал од очекуваното поради зголемувањето од 42 отсото на јавните понуди на акции.
„Вториот квартал се одвиваше во две различни половини,“ рече Пик во говорот за остварената заработка. „Првата половина започна со неизвесност и нестабилност на пазарот поврзана со американската трговска политика, а втората половина заврши со зголемена активност и стабилно закрепнување на пазарите на капитал.“
.webp){kind=icon}
