Водечкиот берзански референтен индекс во еврозоната очекува редок влез на биотехнолошка фирма, ветувајќи дека ќе разгори нов интерес во секторот, кој долго време беше игнориран од претпазливите инвеститори во регионот.
„Арџенкс“ (Argenx SE), чија вредност се проценува на околу 38 милијарди евра по растот од околу 7.200 проценти откако котираше во Брисел пред повеќе од 11 години, в понеделник ќе влезе во индексот Euro Stoxx 50. Тоа ќе биде првата биотехнолошка компанија што ќе биде додадена на мерачот барем од 2002 година, кога „Блумберг“ почна да ги следи промените на индексот.
Аналитичарите велат дека акцијата сè уште има голем раст, поттикната од успешниот третман на автоимуна болест и низа други состојби. Вниманието може конечно да се сврти и кон тој сектор, кој е богат со ветувања, но е потценет во регионот.
„’Арџенкс’ е пример на глобално ниво“, рече аналитичарот на банката „Дегроф Петеркам“ (Bank Degroof Petercam), Дејвид Сејнаев, кој има рејтинг за купување на акцијата. „Тоа ќе помогне европските инвеститори, кои имаат тенденција да бидат посклони кон ризик во споредба со американските инвеститори, да се заинтересираат за приказната.“
Судбината на компанијата е тесно поврзана со „вивгарт“ (Vyvgart), третман чии приходи речиси се удвоија во вториот квартал во однос на претходната година, според податоците собрани од „Блумберг“.
Лекот доби одобрение од САД кон крајот на 2021 година како лек за мијастенија гравис. Потоа следуваше одобрение минатата година за третман на хронична воспалителна демиелинизирачка полиневропатија - ХИДП (CIDP), состојба што доведува до мускулна слабост и губење на чувството во рацете и нозете.
Bloomberg Mercury
Болестите создаваат големи незадоволени потреби на пациентите, рече аналитичарот на „Барклис“ (Barclays Plc), Чарлс Питман-Кинг, кој исто така има рејтинг еквивалентен на купување на акциите. „Со околу 15 вкупно индикации што моментално се испитуваат, ова создава имот во производ во развој што може да генерира огромна оперативна предност“, рече тој.
Фокусот се префрла и на други области од подрачјето на „Арџенкс“, вклучувајќи го и неговиот експериментален ARGX-119 за конгенитални мијастенични синдроми, група болести карактеризирани со мускулна слабост. Во моментов не се одобрени терапии од страна на Американската администрација за храна и лекови за овие ретки наследни болести.
„’Арџенкс’ ќе треба постепено да го диверзифицира своето портфолио за да ја ограничи својата идна зависност од ‘вивгарт’“, напиша вчера аналитичарот на „Одо“ (Oddo BHF) Марсијал Дескутур, зголемувајќи ја притоа својата целна цена за акциите. „Научното образложение за ARGX-119 е основано, а неговата комерцијална привлечност е значајна.“
Биотехнолошките компании обично го унапредуваат научното разбирање во потрагата по третмани - високоризична и високопрофитна потрага што често завршува така што поголемите фармацевтски компании ги грабнуваат откако нивните експериментални лекови ќе покажат некаков потенцијал. Еден таков пример е минатогодишното купување на „Морфозис“ (MorphoSys AG) од страна на „Новартис“ (Novartis AG) за 2,7 милијарди евра.
Друга котирана биотехнолошка компанија во Европа е „Џенмеб“ (Genmab A/S), котирана на берзата во Копенхаген со пазарна процена од околу 18 милијарди долари. „Биоверзис“ (BioVersys AG), која годинава котираше на берзата во Цирих, моментално се тргува со околу 12 проценти под цената на првичната јавна понуда.
„’Арџенкс’ е одлична илустрација за успешна компанија што го поминала критичниот премин од клинички развој до комерцијална фаза на биофармацевтска компанија“, рече Аилса Крег, менаџерка за портфолио во Меѓународниот биотехнолошки фонд. „Сега е веќе етаблиран играч“, вели таа.
Аналитичарите остануваат претежно оптимисти за „Арџенкс“, при што 14 од 16-те што ги следи „Блумберг“ ја оценија фирмата за купување или еквивалент. Акцијата е меѓу најдобрите избори на Банката на Америка (Bank of America Corp.) за 2025 година, а се очекува замавот да продолжи и во 2026 година, напишаа аналитичарите, вклучувајќи го и Тазин Ахмад.
Сепак, „Дојче банк“ (Deutsche Bank AG) минатата недела ја намали оценката на акцијата од „купи“ на „држи“ по растот од повеќе од 30 проценти од почетокот на јули.
Други аналитичари гледаат понатамошен раст, при што просечната целна цена подразбира добивки од повеќе од 10 проценти од сегашните нивоа.
„Во текот на изминатите пет години, цената на акциите на ’Арџенкс’ се зголеми за околу 250 проценти, што ја одразува значајната вредност создадена преку нејзиното лансирање и последователното извршување“, рече Крег.
.webp){kind=icon}
Во моментов нема коментари за веста. Биди прв да коментира...