Кина: „Енвидија“ ги прекршила правилата за конкуренција во зделка со чипови

Кина утврди дека „Енвидија“ (Nvidia Corp.) го прекршила законот за конкуренција со една високо профилирана зделка од 2020 година, зголемувајќи го притисокот врз Вашингтон во текот на чувствителните трговски преговори.

Американскиот производител на чипови беше прогласен за виновен за прекршување на правилата за конкуренција по аквизицијата на производителот на мрежна опрема „Меланокс технолоџис“ (Mellanox Technologies Ltd.), соопшти Државната управа за регулирање на пазарот на Кина (SAMR) по завршувањето на прелиминарната истрага. Акциите на „Енвидија“ паднаа за околу 2 отсто во тргувањето пред отворањето на берзата, додека американските индексни фјучерси ги намалија добивките.

Неочекуваното соопштение дојде во момент кога американските и кинеските претставници влегоа во втор ден на сеопфатни преговори во Мадрид за тарифите, кои би можеле да ја обликуваат иднината на односите меѓу двете најголеми економии во светот. „Енвидија“ годинава се најде во центарот на тие дискусии поради нејзината клучна улога во развојот на идните технологии, вклучувајќи ја и вештачката интелигенција.

Во декември Пекинг отвори истрага за аквизицијата на „Меланокс“ од страна на „Енвидија“, насочувајќи се кон највредната компанија во светот. Пекинг ја одобри аквизицијата вредна 7 милијарди долари пред четири години, под услов „Енвидија“ да не дискриминира кинески компании.

Американската влада потоа воведе регулативи со кои забрани „Енвидија“ да им ги продава своите најнапредни ВИ-чипови на кинески компании, вклучувајќи го и моделот H100, поради, како што наведоа, загриженост за националната безбедност. „Енвидија“ ги редизајнираше своите чипови најмалку двапати за да се усогласат со американските правила и за да може да ги продава на кинескиот пазар.

Прелиминарната одлука донесена денеска дојде само неколку недели откако САД се согласија да дозволат „Енвидија“ и „Адвансд мајкро дивајсис“ (Advanced Micro Devices Inc.) да им продаваат дел од своите најбарани ВИ-чипови на кинески компании. Сепак, Пекинг оттогаш ги поттикнува локалните компании и агенции да го избегнуваат чипот H20 на „Енвидија“, повикувајќи се на безбедносни причини.

Регулаторот не прецизира какви мерки би можеле да следуваат. Агенцијата најави дека ќе спроведе понатамошна истрага, без дополнителни детали. „Енвидија“ не одговори веднаш на барањето за коментар.

Нејасно е какво влијание ќе има ова соопштение врз преговорите во Мадрид. Првиот ден од разговорите траеше речиси шест часа, посочи висок претставник на американското Министерство за финансии, опфаќајќи теми од Тикток (TikTok) до трговијата и глобалната економија. За време на викендот, Кина исто така соопшти дека започнува антидампинг-истрага насочена кон одредени американски полупроводници. Акциите на американските производители на чипови, вклучувајќи го и „Тексас инструментс“ (Texas Instruments Inc.), паднаа во тргувањето пред отворањето на берзата.

Популарната апликација на „Бајтденс“ (ByteDance Ltd.) се соочува со рок неделава за постигнување договор што ќе овозможи да продолжи со работа во САД. „Ројтерс“ претходно објави дека се очекува администрацијата на Трамп повторно да го продолжи рокот за продажба на Тикток.

Во моментов нема коментари за веста. Биди прв да коментира...

Остави коментар