Истекуваат опции за биткоинот вредни 14 милијарди долари, што ќе се случи со цената?

Најголемиот истек на опции на биткоинот годинава се совпаѓа со геополитичка нестабилност, која не покажува знаци на смирување, заедно со неизвесни разговори за потенцијален мировен договор.

Приближно 14 милијарди долари биткоин-опции истекуваат в петок, мерено според отворените договори. Кварталното префрлање (rollover) – кое брише речиси 40 проценти од отворените позиции на водечката берза „Дерибит“ (Deribit) – се случува во време на контрадикторни сигнали за можноста за крај на речиси еден месец долгата војна на Блискиот Исток.

По истекот на опциите, силите што ја кочеа волатилноста ќе попуштат – а контролата повторно ќе ја преземат макроекономијата и геополитиката.

Ова преклопување ја заострува клучната дилема за трговците: дали истекот на опции вештачки ја ублажувал нестабилноста на цената на биткоинот и дали неговиот крај ќе ја изложи криптовалутата на поостри поместувања предизвикани од геополитичките фактори.

Биткоинот во последните недели се движеше меѓу приближно 60.000 и 75.000 долари и останува значително под врвот од околу 126.000 долари во октомври 2025 година, откако пазарот на 10 октомври доживеа поширок пад. Недостигот од јасен правец останува и покрај геополитичките тензии и повремените приливи во американските фондови тргувани на берза (ЕТФ). Во четвртокот биткоинот во САД падна до четири проценти, на 68.122 долари, додека инвеститорите од спот ЕТФ повлекоа 171 милион долари. Во петокот рано наутро во Лондон се тргуваше по цена од околу 68.700 долари.

Позиционирањето на пазарот на деривати, според учесниците на пазарот, помага да се објасни релативниот мир. Институционалните инвеститори во првиот квартал претежно продаваа облози на раст - со што всушност предвидуваа дека цените нема да растат силно - за да остварат приходи во смирен пазарен контекст, рече Џејмс Харис, извршен директор на менаџерот на имот „Тесарект“ (Tesseract). На тој начин ризикот беше пренесен на одржувачите на пазарот (market makers), кои купуваат при падови и продаваат при раст за да ја одржат балансираната изложеност.

Како последица, волатилноста беше намалена, велат трговците, при што цената често се приближуваше до таканареченото ниво на „најголема болка“ (max pain) - точка во која најмногу опции истекуваат без вредност - близу 75.000 долари. Во практика, тие заштитни текови дејствуваа како магнет: го туркаа биткоинот нагоре, но истовремено го ограничуваа понатамошниот раст.

„Заштитните текови можат да ја движат цената кон тоа ниво, но всушност го ограничуваат опсегот на движење“, рече Харис.

Кога договорите истекуваат, механичките купувања и продажби поврзани со осигурување позиции исчезнуваат, што биткоинот може да го остави изложен на надворешни фактори. А тие се насобираат. Во четвртокот претседателот Доналд Трамп го одложи рокот за договор со Иран или нови напади, велејќи дека преговорите се одвиваат „многу добро“.

„Без јасен правец од Блискиот Исток, биткоинот веројатно ќе остане во опсег меѓу 70.000 и 75.000 долари“, изјави Андреја Цобелјич, раководител на тргување со деривати во АМИНА (AMINA Bank), додавајќи дека горната граница може да дејствува и како магнет и како отпор. Реално примирје би можело да го придвижи биткоинот над 75.000 долари и да поттикне дополнителен раст, бидејќи би се затвориле кратките (bearish) позиции. Неуспехот на преговорите, пак, би можел да ја врати криптовалутата кон опаѓачка линија на 68.500 долари, додаде тој.

Пошироката околина обезбедува ограничена поддршка. Во март во биткоин ЕТФ-ови влегоа околу 1,4 милијарда долари нето-средства - што означува стабилизација по четири последователни месеци на нето-одливи - но тие текови се покажаa чувствителни на макроекономски промени. Кон средината на март, на пример, во еден ден биле повлечени 163 милиони долари поради промените во очекувањата за каматните стапки.

Таa кршливост ја нагласува клучната порака од истекот во петокот: смиреноста на биткоинот можеби е повеќе резултат на пазарни структури отколку на фундаментални фактори.

Јаспер де Маере, вонберзански трговец во „Винтермјут“ (Wintermute), рече дека динамиката на опции може да создаде „блага склоност кон нагоре“, но убедувањето на инвеститорите останува слабо. По истекот на опциите, силите што ја кочеа волатилноста ќе попуштат - а контролата повторно ќе ја преземат макроекономијата и геополитиката.

Тоа значи дека пазарот е изложен на поостри поместувања ако се промени расположението.

„Ризикот не е во тоа што институционалните инвеститори не се присутни. Ризикот е во тоа што се присутни, но брзо ќе излезат ако викендот донесе негативен исход - а структурната поддршка што постоеше минатата недела повеќе нема да ги ублажува движењата. Поголема е веројатноста волатилноста по петокот да се зголеми, а не да се намали“, рече Харис.