Повеќе од половина од биткоинот сега е во загуба - знак што не треба да се игнорира

Најновиот пад на биткоинот беше толку остар што повеќе од половина од неговата понуда во оптек турна во зоната на загуба.

Со цена од околу 61.000 долари - што е пад од околу 50 проценти во однос на неговите  рекордни нивоа - и со нов пробив под неговиот 200-неделен подвижен просек, биткоинот брзо трупа загуби за сè поголем удел од неговите сопственици. За првпат од крајот на 2022 година повеќе од 50 проценти од токените со кои се тргува биле купени по повисока цена од сегашната, според Ветле Лунде од К33 (K33 Research). Таа бројка пред само еден месец изнесувала само 30 проценти.

Тоа е најнов знак на стрес за пазарот, кој веќе со месеци е зафатен од надолен тренд. Биткоинот и голем број други криптовалути бележат пад од октомври, а ретките позитивни случувања не успеаја да го запрат падот што минатата недела го доведе најголемиот токен на неговото најниско ниво од 2024 година и ги избриша сите добивки остварени за време на прокрипто политиките на Трамп.

Најновиот бран на пад беше поттикнат откако компанијата „Стратеџи“ (Strategy Inc.), која чува биткоин во своите резерви, најави продажба на помал број токени. Тоа предизвика вознемиреност кај трговците со оглед на важноста што оваа компанија ја има во рамките на криптоекосистемот. Одливите од инвестициските фондови (ЕТФ) ориентирани кон биткоин исто така се забрзаа, а волатилноста се искачи на тримесечен максимум, наведуваат од K33.

За сопствениците на биткоин - и долгорочните и краткорочните - ова беше болен период.

„Цените се движат поради структурното позиционирање, лостот, емоционалните реакции и ризиците водени од конкретни настани, но пошироката слика е одраз на упорните пазарни услови“, изјави Офелија Снајдер, коосновачка на компанијата за управување со средства „21 шерс“ (21Shares). „И додека тие основни услови не се променат, мислам дека веројатно ќе продолжиме да го гледаме истото нешто: пазари заробени во опсег, периодична волатилност, ресетирање на лостот и голем број инвеститори што го чекаат следниот навистина важен катализатор.“

Значењето на ова ги надминува самите загуби на хартија. Најсилните подеми на биткоинот историски зависеле од привлекување нови купувачи што биле подготвени да платат повисоки цени од претходниот бран инвеститори. Кога повеќе од половина од понудата е „под вода“, пазарот почнува да го носи товарот на милиони разочарани сопственици што  поверувале во минатогодишниот ентузијазам.

Тоа може само по себе да стане пречка. Инвеститорите што седат на големи загуби често ги користат скоковите на цените како можност за излез од позициите, наместо за нивно зголемување, создавајќи така извор на латентен притисок за продажба. Во исто време, долготрајниот пад ризикува да оштети едно од највредните средства на биткоинот: неговата репутација како инвестиција што сигурно го наградува трпението. Секој месец поминат далеку под рекордните нивоа е уште еден месец во кој новата генерација на инвеститори криптовалутите помалку ги поврзува со извонредни добивки, а повеќе со пропуштени можности - особено додека капиталот брза кон побрзорастечки приказни на други пазари, како што се производителите на ВИ-чипови.

„По 17 години, биткоинот сè уште нема никаква цел освен чиста шпекулација“, рече Мајкл О’Рурк, главен пазарен стратег во „Џонс трејдинг“ (JonesTrading).

На површината, случувањата во криптопросторот изгледаа конструктивно, спротивставувајќи се на вознемирената природа на самиот пазар. Администрацијата на Трамп се покажа отворена кон криптовалутите, поттикнувајќи различни регулативи за овие производи да се доближат до традиционалните финансиски текови. Традиционалните финансиски институции исто така почнаа повеќе да ги прифаќаат како што се ширеше базата на инвеститори. Покрај тоа, различни проекти конечно се градат врз темелите на криптотехнологијата, што е визија што поддржувачите на дигиталните средства долго време ја промовираат.

Но реалноста на теренот е значително помрачна. Групата на биткоин берзански фондови (ЕТФ) со кои се тргува во САД забележа околу 5,5 милијарди долари одлив во изминатиот месец, според податоците собрани од „Блумберг“, што создаде дополнителен притисок врз самата цена. Во меѓувреме, вкупниот обем на тргување на централизираните берзи минатиот месец падна на четири билиони долари на месечно ниво, што е втор последователен месец оваа бројка да биде на најниско ниво во речиси две години, според извештајот на тимот за истражување дигитални средства на „Кантор“ (Cantor).

Сепак, Лунде од K33 гледа можеби трошка надеж среде оваа лавина од лоши вести. Историски гледано, ситуацијата во која половина од биткоинот во оптек е „под вода“ се забележувала само блиску до дното на големите „мечкини“ пазари, „како што притисокот за продажба од страна на профитабилните сопственици станува сè поисцрпен“.

Во минатото биткоинот имал тенденција да го достигне дното во рок од неколку недели по преминувањето на тоа ниво, иако знаел да претрпи и дополнително „последно поместување надолу“, напиша Лунде во белешка.

„Иако тоа не е гаранција, ваквата поставеност сугерира дека просторот за понатамошен пад би можел да биде ограничен во споредба со потенцијалот за раст во наредната година, што ги зацврстува аргументите за оптимистички став“, заклучи тој.