Обид за кражба на вртоглави 6,3 милијарди долари од криптоберзата „Бајненс“

Хакерскиот напад врз „Бајненс“, најголемата светска берза за криптовалути, повторно го потресе дигиталниот пазар.

„Бајненс“ соопшти дека во инцидентот, кој во индустријата се опишува како најголем хакерски напад во историјата на криптовалутите, биле загрозени 6,3 милијарди долари. Вредноста на дигиталните токени падна.

„Проценетото вкупно влијание изнесува околу 6,3 милијарди долари“, објави „Бајненс“ на платформата X. „Соработуваме со партнерските блокчејн-мрежи за да ги замрзнеме погодените средства, а досега на блокчејнот се замрзнати околу три милијарди долари.“

„Бајненс“ привремено ги суспендираше сите повлекувања на средства, за кои очекува повторно да бидат овозможени во рок од 48 часа, изјави коосновачката Ји Хе во објава на X. Од компанијата порачаа дека ќе ги покријат сите загуби и дека „средствата на корисниците се безбедни“.

Компанијата за анализа на блокчејн „ТРМ Лабс“ соопшти дека зад кражбата стои Северна Кореја, нарекувајќи ја „најголемата забележана кражба на криптовалути во историјата“.

„ТРМ нападот ѝ го припишува на групата 'TraderTraitor', елитна хакерска единица на Северна Кореја, врз основа на доверливи разузнавачки информации собрани во и надвор од блокчејнот“, соопшти компанијата. „Овој заклучок го донесуваме со високо ниво на сигурност.“

Досега за најголема јавно позната кражба на криптовалути се сметаше онаа на берзата „Бајбит“ во февруари 2025 година, кога напаѓачите украдоа речиси 1,5 милијарди долари во токени. За криптоинвеститорите кои уживаа во двомесечно закрепнување на цените, инцидентот со „Бајненс“ претставува потенцијален удар.

Озлогласените претходни случаи на кражби и измами поврзани со пропаднати криптогиганти беа основа за долготрајни мечкини пазари, последици што индустријата се обидуваше да ги остави зад себе во новата ера на поголема регулаторна јасност за криптовалутите што ја вети американскиот претседател Доналд Трамп.

Биткоинот падна за три отсто на крајот од американската трговска сесија, а потоа загуби уште три отсто за време на тргувањето во Азија, паѓајќи под 77.000 долари, што е најниско ниво од септември. И другите токени беа погодени од распродажба.

„Гласините за хакерскиот напад врз 'Бајненс' дефинитивно ги туркаат цените на криптовалутите надолу“, изјави Фредрик Колинс, главен извршен директор и коосновач на платформата за криптоподатоци „Вело дата“. „'Бајненс' е толку голем играч во светот на криптовалутите што секој удар врз довербата во него претставува удар врз довербата во целата индустрија, особено затоа што луѓето и онака беа вознемирени поради сè поголемите кибернетички способности на вештачката интелигенција.“

Според ТРМ, се чини дека хакерите го искористиле начинот на кој „Бајненс“ ги одобрува трансакциите. Изгледа дека добиле пристап до системите на берзата и користеле интерен софтвер за одобрување трансфери на 10 различни блокчејни, вклучувајќи ги биткоин и етериум.

Од „Бајненс“ соопштија дека инцидентот можеби вклучува компромитиран лаптоп на софтверски инженер. „Не пронајдовме никакви докази за протекување на приватните клучеви на паричниците“, објави компанијата.

Итниот осигурителен и резервен фонд на „Бајненс“, наречен Фонд за безбедни средства на корисниците (SAFU), е основан во 2018 година за да служи како заштитна мрежа за клиентите во „екстремни ситуации“, наведува берзата. Фондот вообичаено се одржува на ниво од околу една милијарда долари, но во минатото неговата вредност варирала во согласност со пазарните движења, објави „Бајненс“ во 2024 година.

Двата најголеми издавачи на стабилни криптовалути (stablecoin) соопштија дека презеле чекори за замрзнување на исчезнатите средства. Паоло Ардоино, главен извршен директор на „Тетер“, објави на X дека замрзнал повеќе од 1,5 милијарди долари во стабилни криптовалути „поврзани со потенцијалниот хакерски напад врз берзата 'Бајненс'“. Џереми Алер, кој ја води компанијата „Сиркл интернет груп“, изјави дека се замрзнати 800 милиони долари од нивната криптовалута поради „извештаи за потенцијална злоупотреба поврзана со 'Бајненс'“.

Расположението и онака беше кревко по серијата безбедносни инциденти во светот на криптовалутите. Во последните месеци, стотици милиони долари беа извлечени од платформата „Битгет“, додека манипулациите поврзани со уредите на „Леџер“ исто така доведоа до загуби вредни неколку милиони долари.

„Напаѓачите дејствуваат со досега невидена брзина и размери, но и алатките за следење и трагање функционираат со истата брзина“, изјави Ари Редборд, глобален раководител за политики во ТРМ. „Издавачите на стабилни криптовалути замрзнуваат средства во рок од неколку часа. Истражителите ги следат средствата низ блокчејните во реално време.“

Трговците веќе се подготвуваа за поголема нестабилност на криптопазарот оваа седмица, имајќи предвид дека во петок истекуваат опции во вредност од 11 милијарди долари. Сето тоа се случува неколку дена пред американските меѓуизбори што ќе се одржат следната недела, на кои демократите потенцијално би можеле повторно да освојат еден или двата дома на Конгресот и да го отворат патот за построг регулаторен надзор врз индустријата.

Кражбите на криптоберзите и злоупотребите беа постојана сенка во речиси дваесетгодишниот подем на криптовалутите. Меѓу најпознатите случаи е колапсот на „Еф-ти-екс“ (FTX ) на Сем Бенкман-Фрид во ноември 2022 година. Во инцидент што и натаму важи за една од најозлогласените хакерски афери, јапонската биткоин-берза „Ем-ти гокс“ (Mt. Gox) беше нападната во 2011 година. Со текот на времето, хакерите избегаа со токени кои според денешните пазарни цени вредат милијарди долари, а берзата на крајот банкротираше.

„Ова е огромна штета за криптовалутите поради континуираните и успешни хакерски напади во тој сектор“, изјави Тијан Зенг, главен извршен директор на крипто-хеџ фондот „Трд ај“ (Third Eye). „Фактот што злоупотребите постојано се случуваат ја прави целата работа ризична во време кога најновите модели на вештачка интелигенција се објавуваат на секои две недели.“

Инцидентот со „Бајненс“ се случи истиот ден кога платформата за предвидувања „Полимаркет“ на еден час го суспендираше тргувањето на својата меѓународна берза, откако објави дека бил компромитиран надворешен добавувач на софтвер. Повеќе од 700 корисници на „Полимаркет“ останале без средства во вредност од 2,7 милиони долари, објави платформата за блокчејн-аналитика „Баблмапс“ на X. Портпарол на компанијата одби да ги коментира овие бројки.

Неодамнешните безбедносни инциденти не беа ограничени само на криптокомпаниите. Јужнокорејската „Дајшин секјуритис“  оваа недела објави протекување податоци што погодило околу 38.000 клиенти, а „Мира асет глобал инвестментс“ извести за хакерски инцидент, пренесе „Јонхап“. Во Јапонија, хакери во вторникот се заканија дека ќе објават податоци за трговци кои ја користат облачната платформа на групацијата „ГМО интернет груп“ за тргување на девизниот пазар.