.webp){kind=icon}
Компанијата „Мастеркард“ (Mastercard Inc.) ја претстави услугата која ќе им овозможи на клиентите да купуваат и продаваат дигитални средства преку нивните банкарски сметки, потенцијално отворајќи го патот за илјадници финансиски фирми за првпат да понудат крипто-тргување.
Производот наречен „Крипто сорс“ (Crypto Source), ќе биде лансиран во САД, Израел и Бразил на почетокот на следната година преку пилот-програма, изјави во интервју Ајај Бала од Mastercard. Тој одби да каже кои банки први ќе учествуваат во проектот.
Додека банките во последните неколку години се загреаа за криптовалутите, мнозинството од нив избегнуваа да чуваат виртуелни валути и да им ги нудат на своите клиенти поради загриженоста во врска со регулативата. Но, со илјадници банкарски партнери, услугата на Mastercard може да им помогне на криптовалутите да добијат поголема привлечност.
Прочитај повеќе
Регулаторите на Волстрит бараат поголема моќ за контрола на биткоинот
Aмериканските финансиски регулатори сакаат Конгресот да им даде нови овластувања директно да го надгледуваат тргувањето со биткоини.
05.10.2022
Bloomberg
Можноста за купување на криптовалути од вашата банка каде што имате банкарска сметка е многу голема потреба на пазарот и нешто што го сакаат потрошувачите, објаснува Бала.
Crypto Source ќе се нуди преку партнерство со компанијата за дигитални средства „Паксос траст“ (Paxos Trust Co.), која ќе обезбедува услуги за тргување и чување на виртуелни валути во име на банките. Ова значи дека заемодавачите нема да држат средства на нивните биланси.
Падот на пазарот на криптовалути предизвика низа банкроти, отпуштања и неуспеси во секторот. Крахот збриша речиси две илјади милијарди долари од пазарната вредност на криптовалутите, но сè уште не ги одврати големите финансиски компании од идејата да понудат производи и услуги во секторот. На крајот на минатиот месец, на пример, берзанската компанија „Насдак“ (Nasdaq Inc.) објави дека ќе започне да нуди услуги за чување на дигитални средства за своите клиенти.
Овој производ е само најновиот налет на Mastercard кон криптовалутите. Компанијата во февруари соопшти дека годинава ќе вработи повеќе од 500 луѓе бидејќи го проширува одделот за податоци и услуги, што ќе вклучи и лансирање на консултантска единица фокусирана на криптовалути.
Минатата година, „Пурчејс“ (Purchase) со седиште во Њујорк им олесни на банките да нудат криптовалути преку нивните кредитни и дебитни картички со склучување договор со „Бакт“ (Bakkt). Mastercard, исто така, почна да им дозволува на стартапите фокусирани на крипто и дигитални средства да се приклучат на програмата Start Path, која им овозможува на новите компании пристап до технологијата на нивната мрежа за да им помогне да растат.
