Маск со еден твит ја крена вредноста на биткоинот за 600 долари

По драмата околу ФТХ (FTX), која доведе до банкрот на една од најголемите криптоберзи во светот, вредноста на криптовалутите падна како што се очекуваше. Биткоинот изгуби повеќе од пет отсто од својата вредност во текот на викендот, на 15.878 долари. Со исклучок на неколку часа помеѓу 9 и 10 ноември, вредноста не била толку ниска од декември 2020 година. Сепак, по твит на Илон Маск, вредноста на биткоинот се зголеми за 600 долари за неколку минути, на 16.500 долари.

„Идејата дека биткоинот е вреден дел за разновидност на портфолијата со ризични средства сега се распаѓа“, пишува репортерот на „Блумберг“, Гарфилд Клинтон Рејнолдс. „Колапсот доаѓа како показател дека дури и ФТХ, кој до неодамна важеше за еден од најсилните фактори во светот на криптовалутите, е подложен на нестабилност и предизвика огромни загуби за инвеститорите. Само 'Секвоја капитал' (Sequoia Capital) изгуби 150 милиони долари со колапсот на ФТХ“, им порача тој на инвеститорите.

Bloomberg Chartmaker

По банкротот на ФТХ, шефот на ривалската берза за криптовалути „Бајненс“ (Binance), Чангпенг Жао, најави дека компанијата планира да воспостави глобални стандарди за регулација на криптовалутите заедно со другите играчи во индустријата. „Како индустрија, треба да ја зголемиме транспарентноста“, рече Жао на конференција во Бали, Индонезија. „Треба да соработуваме многу тесно со регулаторите низ светот за да ја направиме оваа индустрија поотпорна. Регулаторите имаат важна улога“, посочи тој.

Жао беше вклучен во јавниот спор со Сем Бенкмен-Фрид, основачот на ФТХ. Спорот беше дел од синџирот настани што доведоа до колапс на криптоберзата. Како резултат на превирањата, многу инвеститори почнаа да ја доведуваат во прашање иднината на дигиталните средства, а државите и централните влади веќе брзаат да подготват регулатива за криптовалути, како и да воведат свои дигитални валути.

Во моментов нема коментари за веста. Биди прв да коментира...

Остави коментар