.webp){kind=icon}
Биткоинот денеска го надмина прагот од 21.000 долари поради оптимизмот дека можеби го достигна дното, а инфлацијата го достигна врвот. Најголемата криптовалута порасна дури за 7,5 отсто, искачувајќи се на 21.299 долари, пред да ги намали придобивките како што одминува денот. Над 20.000 долари биткоинот не беше од 8 ноември, а денеска е 11-ти ден по ред како е над тоа ниво.
Вториот по големина токен, етерот, се зголеми дури за 9,7 проценти, а помали добивки забележаа и другите, како кардано и догкоин. Солана порасна дури за 35 проценти. Целокупната пазарна капитализација на криптоуниверзумот надмина една илјада милијарди долари за првпат од почетокот на ноември, според податоците на „Коингеко“ (CoinGecko).
„Од почетокот на годината постои стабилен раст. Се чувствуваме како да наидовме на 'воздушен џеб' за снабдување и го пробивме отпорот од 20.000 американски долари, каде што неколкупати досега запиравме. Оптички, 20.000 долари за многумина претставуваат клучно ниво“, рече Сиси Лу, главен извршен директор на „Вен линк“ (Venn Link Partners Pte).
Американските краткорочни очекувања за инфлација во САД паднаа на почетокот од јануари на најниско ниво во последните две години, обезбедувајќи поттик за расположението на потрошувачите поголем од очекуваното, според прелиминарното истражување на Универзитетот во Мичиген.
Извештајот покажа раст на потрошувачките цени на годишно ниво од 6,5 проценти во декември, што ја означи најбавната стапка на инфлација во повеќе од една година. ФЕД се на пат да се спуштат кон помали зголемувања на каматните стапки по натамошното заладување на цените, иако тие веројатно ќе продолжат да растат додека притисоците не покажат поконкретни знаци на забавување. Тоа помогна да се зајакнат ризичните средства, како што е берзанскиот индекс Nasdaq 100, кој растеше шест дена по ред.
„Криптосредствата се покажаа добри по податоците за потрошувачките цени, кои покажуваат меко покачување во однос на претходно. Овонеделното следење на ценовната акција е секако охрабрувачко и исклучувајќи какви било присилни ликвидации од страна на проблематичната криптокомпанија DCG, постои голема веројатност дека ова беше апсолутното дно за цените на крипто“, рече Шон Фарел, раководител за стратегии за дигитални средства во „Фондстрат“ (Fundstrat).
Bloomberg Mercury
Цената на биткоинот со недели беше заглавена во тесен опсег од 16.000 до 17.000 долари пред најновиот пробив. Сепак, нагорната траекторија би можела да внесе уште поголем оптимизам на пазарот, кој се бори да најде добри вести во последниве месеци.
„Намалувањето на инфлацијата, заедно со најавата дека ликвидаторите на ФТХ вратиле пет милијарди долари од ликвидните средства, даде на криптопазарите многу фактори за да ја заборави макросликата, која сè уште е нарушена“, рече Хајден Хјуз, главен извршен директор на платформата за социјално тргување „Алфа“.
