.webp){kind=icon}
Холандската централна банка ја казни криптоберзата „Коинбејс“ (Coinbase) за обезбедување услуги за дигитални средства во земјата пред нејзината локална регистрација во септември. Централната банка во четвртокот соопшти дека ѝ изрекува административна казна од 3,33 милиони евра (3,63 милиони долари) на „Коинбејс Европа“ (Coinbase Europe Ltd) поради работење во земјата без да се регистрира кај монетарната власт. „Коинбејс“ ја доби својата регистрација во Холандија на 22 септември.
Компаниите што сакаат да обезбедат криптоуслуги во Холандија се обврзани да се регистрираат во централната банка според холандскиот закон за спречување на перењето пари и финансирање на тероризмот. Централната банка соопшти дека основниот износ на казната е зголемен поради сериозноста и степенот на вина на неусогласеноста.
Централната банка соопшти дека „Коинбејс“, која има значителен број клиенти во Холандија, не ги почитувала нејзините правила од ноември 2020 до август 2022 година.
„Ова значеше дека 'Коинбејс' не можеше да пријави невообичаени трансакции до Единицата за финансиско разузнавање на Холандија за време на периодот на неусогласеност. Голем број невообичаени трансакции можеби останаа незабележани од истражните органи во овој период“, соопшти централната банка.
Портпаролот на „Коинбејс“ рече дека компанијата не се согласува со казната и иако го почитува овластувањето на централната банка да ги спроведува прописите, внимателно ги разгледуваат приговорите и процесот на жалби.
„'Коинбејс' е посветена компанија на усогласеноста во сите јурисдикции во кои работи и ќе продолжи да им обезбедува безбедни доверливи услуги на новите и постојните холандски клиенти. Компанијата не треба да биде казнета за играње според правилата и вклучување во овој процес“, изјави Мери Кејт Колинс, портпаролка на „Коинбејс“, преку електронска пошта за „Блумберг“.
