.webp){kind=icon}
„Бајненс“ (Binance), најголемата берза за криптовалути во светот, соопшти дека привремено ги суспендира депозитите и исплатите во американски долари преку банкарски сметки и ќе работи на скоро рестартирање на услугата.
„Суспендирањето ќе започне в среда“, изјави портпаролот на „Бајненс“, кој не ја наведе причината за суспензијата. „Банкарските трансфери што користат други фиксни валути, како што е еврото, не се засегнати“, рече претставникот.
„Вреди да се напомене дека само 0,01 отсто од нашите месечни активни корисници користат банкарски трансфери во американски долари, но работиме напорно за да ја рестартираме услугата што е можно поскоро“, рече портпаролот во изјавата испратена по електронска пошта.
Другите методи за купување и продавање крипто на „Бајненс“, како што е преку кредитните картички, „Гугл пеј“ (Google Pay) и „Епл пеј“ (Apple Pay), остануваат непроменети.
Криптокомпаниите имаа тешкотии да најдат банкарски партнери за да го олеснат испраќањето пари за купување и продавање дигитални средства. По падот на ФТХ (FTX), банките беа предупредени од федералните регулатори за ризиците од водење бизнис со криптофирми. Минатиот месец „Бајненс“ рече дека нејзиниот банкарски партнер „Сигначр бенк“ (Signature Bank) ќе се справува со корисничките трансакции само ако тие се поголеми од 100.000 долари, бидејќи давателот ја намалува својата изложеност на пазарите на дигитални средства. Банката со седиште во Њујорк во декември соопшти дека има намера да намали за дури 10 милијарди долари депозити од криптоклиенти. Портпаролот на банката денеска рече дека не може да коментира за прашања поврзани со клиентите.
