За повисоката цена на вашиот омилен „ролекс“ се виновни криптомомците

Ако „ролексот“ за кој имате мерак станува поскап, веројатно виновен е биткоинот. Последниот пат кога криптовалутата порасна, во 2021 година, доведе до силен скок на цената на половните часовници. Има големи шанси неодамнешното заживување на биткоинот да ја зголеми вредноста на часовниците до рекордни височини, но засега повторувањето на невидениот раст на кој тогаш бевме сведоци изгледа далеку.

Цените на часовниците на секундарниот пазар во последните пет години во голема мера се движат во согласност со биткоинот и индексот S&P 500. Корелацијата помеѓу криптовалутата и часовниците не беше точна последниот пат кога валутата полета; биткоинот изгуби речиси половина од својата вредност меѓу почетокот на ноември 2021 година и крајот на јануари 2022 година, но цените на часовниците го достигнаа врвот дури во март 2022 година.

Bloomberg Mercury

Добивките од криптовалутите несомнено го зголемија богатството и поттикнаа поширок интерес за инвестирање во алтернативни средства, било да се незаменливи токени (НФТ) или часовници. И почетниците и искусните купувачи бркаа исти модели, односно светото тројство на кое се темели целата треска - „ролекс дејтона“ (Rolex Daytona), „патек филип наутилус“ (Patek Philippe Nautilus) и „одемар пиге ројал оук“ (Audemars Piguet Royal Oak)  - што предизвика цените на користените модели да бидат многу повисоки од цената во продавниците.

Со оглед на тоа што биткоинот доби околу 80 отсто од крајот на јануари, а S&P 500 се стекнува со мали, но постојани и повисоки врвови, не е ни чудо што цените на часовниците на секундарниот пазар се стабилизираа. Индексот Subdial Watch на „Блумберг“ се врати на февруарското ниво на раст, што е за 0,2 отсто најголема месечна добивка од март 2023 година. Слична е сликата и на други места, при што индексот WatchCharts Rolex падна за само 0,6 отсто во текот на изминатиот месец, а цените за „петек филип“ и „одемар пиге“ се исти.

Bloomberg Mercury

Барем некои од оние што заработуваат од биткоинот ќе се почестат, а за многу мажи првиот избор веројатно е часовник. Но не е сосема јасно дали тоа ќе ги стави вредностите на истата нагорна траекторија што ја видовме пред три години.

Тие околности веројатно беа уникатни. Заглавени дома, потрошувачите ги вложуваа парите, кои инаку би ги потрошиле на вечера и одмори, на луксузни стоки. Со толку многу време, ентузијастите станаа опседнати со часовници, со разговори на Редит (Reddit) и видеа на Тикток (TikTok) посветени на модели како „ролексот“ со бројчаник како палмин лист, наречена „вид“ (The Weed). Интересот за часовници, кој претходно беше резервиран исклучиво за колекционерите, стана мејнстрим. Додајте ги државните субвенции и ниските каматни стапки, и шпекулациите експлодираа.

Покрај тоа, тешко е да се одреди колку нови парчиња - уште една клучна детерминанта за цените - допрва ќе се појават на пазарот. За некои што се занимаваа со тоа минатиот пат, можеби користејќи „врски“ за собирање нови парчиња, стабилноста би можела да биде можност за продажба наместо за купување.

Нивоата на резерви остануваат повисоки во споредба со периодот пред две години, со мали знаци за намалување на резервите на „ролекс“, „патек“ и „одемар пиге“ во последните месеци, според „Воч чартс“ (WatchCharts). Следствено, други фактори освен понудата и побарувачката може да придонесуваат за неодамнешното затишје на пазарот, како што се шпекулациите за укинувањето на моделот „ролекс ГМТ мастер 2“ (Rolex GMT-Master II) со рамка во црвена и сина боја, познат како „пепси“, и претстојниот настан „Вочес енд вондерс“ (Watches and Wonders), каде што најпознатите брендови ќе ги покажат своите нови изданија.

Конечно, додека и S&P 500 и биткоинот се во нагорен тренд од октомври, најостриот пораст на вредноста на криптовалутите се случи во изминатите неколку месеци, па за придобивките да го најдат патот до пазарот на часовници, растот мора да се одржи.

Ако се случи тоа, корист, покрај половните часовници, ќе имаат и други сектори. Продажбата во продавниците, која почна да слабее за некои брендови, може да има придобивки. Може да се зголеми и општата побарувачка за луксузни стоки.

Добивките од криптовалутите веројатно сочинуваа дури четвртина од растот на продажбата на луксузни добра во САД во 2021 година, посочија тогаш аналитичарите на „Џефрис“ (Jefferies). Падот во 2022 и 2023 година веројатно придонесе за намалување на трошењето кај комотните, а не кај супербогатите потрошувачи.

Враќањето на довербата кај т.н. аспиративни потрошувачи на луксуз би било добра вест, особено за брендовите што се изложени на оваа демографија, како што се „Керинг“ (Kering SA Gucci) и „Баленсијага“ (Balenciaga), делови од „Луј Витон“ (Louis Vuitton) на ЛВМХ (LVMH), „Монклер“ (Moncler SpA) и британски „Баребери“ (Burberry Group Plc.)  За брендовите од високата класа е многу потребно закрепнување во САД, со оглед на порастот на вредноста на луксузните стоки од крајот на јануари.

Повисоката цена на вашиот „ролекс“ може да биде првиот знак дека биткоинот уште еднаш силно блеска.

Во моментов нема коментари за веста. Биди прв да коментира...

Остави коментар