.webp){kind=icon}
Изненадувачки брзиот излез на биткоинот (BTC) од криптозимата уште еднаш ја стави нестабилната дигитална валута на врвот на листата за најуспешни класи на средства, со голема разлика во првиот квартал.
Со пораст од околу 70 отсто, биткоинот го затвора својот најдобар квартал, по првите три месеци во 2021 година, кога порасна за 103 отсто, покажуваат податоците на „Блумберг“. Со ова многу ги надминува добивката од 5,5 отсто на берзанскиот индекс S&P 500 на почетокот на годината, добивката од 19 отсто на Nasdaq 100 и скокот од 5,3 отсто што го забележа фондот iShares, со кој се тргува на берзата (т.н. ETF, скратено од exchange-traded fund) и кој е фокусиран на американските државни обврзници со рок на достасување од повеќе од 20 години (анг. iShares 220+ Year Treasury Bond ETF).
Долгогодишните учесници на пазарот забележуваат дека нестабилноста е очекувана - па, дури е и дел од привлечноста за инвеститорите во релативно младата класа на средства. Биткоинот влезе во мејнстримот со повеќе од 1.000 отсто годишна добивка во 2017 година, па следната година забележа пад од 74 проценти во она што стана познато како криптозима. Потоа, по три последователни годишни зголемувања, минатата година падна за 64 отсто поради серијата банкроти и скандали во индустријата.
„За многу набљудувачи на криптопазарот, ова воопшто не е изненадување“, вели Ноел Ачесон, авторка на билтенот „Крипто е сега макро“ (Crypto Is Macro Now) во однос на годинешниот скок. „Сите знаци упатуваа на силен долен праг на цената, почнувајќи од минатиот ноември, и беше само прашање на време кога ќе се промени наративот за ликвидност (што се случи на почетокот на јануари) или долгорочните инвеститори ќе видат можност да ја зачуваат вредноста (што, по сè изгледа, исто така се случи).“
Процентуална промена на цените од почетокот на 2023 година (заклучно со 30 март)
Bloomberg
Набљудувачите на пазарот не се согласуваат околу точните причини за големиот скок на биткоинот. Токенот влезе во 2023-та оставајќи ја зад себе својата втора најлоша година досега. Според некои, можеби закрепнал од таквиот удар. Сепак, многу други во последниве недели укажуваат на неговото, условно речено, потекло како причина зошто е повторно баран - во услови на превирања во светскиот банкарски сектор, криптовалутата може да дејствува како прибежиште за инвеститорите, со оглед на нејзината независност од централните банки.
„Повеќето луѓе би рекле дека биткоинот треба да минува ужасно, бидејќи пазарите се под притисок или оптоварување“, вели Питер ван Дојевирт од „Мен солушнс“ (Man Solutions). „Но, всушност, ако размислите за луѓето на кои им се допаѓа биткоинот - им се допаѓа идејата за не-фиат валута, во смисла дека е надвор од системот на американскиот долар, надвор од банкарскиот систем“.
Метју Сигел, шеф за истражување на дигитални средства во „Ван Ек“ (VanEck), се согласува со тоа. „Биткоинот остана отпорен поради легитимните фундаментални подобрувања и неговата единствена улога како носител на средствата во период на скептицизам за банкарските депозити и посилната интервенција на централната банка“, рече тој во интервју.
Рангирање на „Блумберг“ на светските индекси на капитал; Забелешка: Податоците се заклучно со 30 март 2023
Bloomberg
Без оглед на катализаторите, токенот неодамна бележеше раст по раст. Во текот на последните три недели, период што приближно се совпаѓа со времето кога банките во САД почнаа да покажуваат стрес, имаше само осум сесии со загуби (од 22) и вкупен скок од 40 отсто во тој период.
Не порасна само биткоинот - кој моментално се движи во опсег од околу 28.000 долари - во првиот квартал. Етерот зајакна за приближно 50 отсто и се тргува по цена од околу 1.800 долари.
Да бидеме прецизни, има компании, како и фондови со кои се тргува на берзата, што го надминаа биткоинот овој квартал.
Акциите на „Енвидија“ (Nvidia Corp.), со добивка од 87 отсто, пораснаа повеќе од биткоинот од почетокот на годината, како и некои криптоориентирани ETF, како што е „Валкири биткоин“ (Valkyrie Bitcoin Miners ETF), кој скокна речиси 100 отсто.
Но, меѓу главните класи на средства, биткоинот сепак се истакнува. Податоците на „Блумберг“ покажуваат дека во светот на суровините, шеќерот е најуспешен досега оваа година, со раст од 22 отсто. Индексот на вкупниот светски принос од обврзниците поврзани со инфлацијата порасна за четири отсто, додека меѓу светските индекси на акции, Laos Composite Index скокна за повеќе од 44 отсто до четвртокот.
Стефан Оулет, извршен директор на ФРНТ (FRNT Financial Inc.), истакнува дека скоковите на биткоинот се чини дека дошле од „најтемните моменти предзори“.
„По колапсот на банката СВБ и затворањето на 'Сигначур' (Signature), наративот што преовладуваше беше дека тоа ќе значи тежок период за криптовалутите“, вели тој. „Всушност, тие настани го поттикнаа наративот за биткоинот како алтернатива на банкарските решенија и велото крипто, вклучувајќи го и биткоинот, имаше неколку фантастично позитивни трговски денови, што беше неочекувано за многумина“.
