.webp){kind=icon}
Поранешниот криптотитан со нарушен углед, До Квон би можел да го помине поголемиот дел од својот живот зад решетки, прво во својата родна Јужна Кореја, а потоа во САД, според сценариото наведено од главниот обвинител на азиската земја.
Двете земји бараат екстрадиција на Квон по обвиненијата поврзани со колапсот на дигиталните токени што тој ги создаде, односно имплозијата што однесе најмалку 40 милијарди долари. 31-годишникот беше уапсен во Црна Гора во март, со што му заврши периодот во бегство.
Можно е едно лице да биде судено и да добие казна во двете јурисдикции по различни обвиненија, почнувајќи од Јужна Кореја, изјави Дан Сунгхан, кој ја води истрагата за паднатиот бизнисмен. Дан е директор на бирото за истраги за финансиски криминал при Обвинителството од јужниот округ на Сеул.
Дан Сунгхан
Bloomberg
Тие потоа би можеле „да бидат екстрадирани во САД и таму да им се суди, а потоа да ја издржат казната во Јужна Кореја, па во САД после тоа“, вели Дан (49) во интервју за „Блумберг“. Тој додаде дека очекува Квон да добие рекордна казна во неговата земја за случај на финансиска измама - повеќе од четири децении.
Адвокатот Бранко Анѓелиќ, кој го застапуваше Квон во Црна Гора, не можеше да биде контактиран по телефон за коментар околу сценариото што го презентираше Дан.
Проект кој збриша милијарди долари
Квон е ко-основач на „Тераформ лабс“ (Terraform Labs Pte), компанија која разви стабилна криптовалута наречена TerraUSD, која требаше да има постојана вредност од еден долар врз основа на мешавина на алгоритми и финансиски стимулации од трговците. Затоа, системот го вклучуваше и сестринскиот токен Luna. Империјата пропадна во мај 2022 година, влошувајќи го oпштиот пад на криптопазарот и придонесе за колапс на голем број дигитални средства.
„Тераформ лабс“ не одговори веднаш на електронската пошта со кометар за ставовите на Дан по однос на случајот.
Колапсот на TerraUSD
Bloomberg
Во февруари, Комисијата за хартии од вредност на САД (SEC) ги обвини Квон и „Тераформ лабс“ за измама. Американските обвинители подоцна поднесоа обвиненија.
Обвиненијата од Јужна Кореја вклучуваат кршење на законите за пазарот на капитал. Претставници на Квон претходно изјавија дека обвинението за измама со хартии од вредност на САД е неосновано и ги отфрлија наводите на обвинителот во Сеул.
„Ова е најголемата финансиска измама или случај на измама со хартии од вредност што некогаш се случила во Јужна Кореја“, рече Дан, додавајќи дека Квон прво треба да биде екстрадиран во азиската земја.
Во жалбата на SEC се наведува дека Квон и „Тераформ лабс“ префрлиле над 10.000 биткоини од нивнио проект осуден на пропаст и претвориле дел од токените во готовина преку швајцарска банка. Според жалбата, криптовалутите се сместени во таканаречен ладен паричник кој не се наоѓа на ниту една берза за дигитални средства. Агенцијата соопшти дека Квон и „Тераформ лабс“ периодично повлекувале средства од паричникот од мај минатата година.
Мистерија за паричникот
„Можеме да видиме како се повлекуваат средства од паричникот, но не знаеме кој би можел да го поседува ладниот паричник или како ги повлекуваат средствата, со кои методи“, рече Дан.
Обвинителите заплениле 246,8 милијарди вони (190 милиони долари) во врска со случајот и наскоро ќе преземат контрола над уште 31,6 милијарди вони, додаде тој.
Во 2018 година, Квон ја основаше „Тераформ лабс“ со Даниел Шин, кој исто така е обвинет во Јужна Кореја, но негираше вмешаност во имплозијата на TerraUSD и Luna. Ким Ки-донг, адвокатот на Шин, претходно изјави дека Шин „нема никаква врска со колапсот на Terra и Luna, бидејќи ја напушти компанијата две години претходно“.
Даниел Шин
Bloomberg
„Обвинението на обвинителството се состои од неосновани претпоставки кои се во спротивност со објективните факти“, рече Ким во изјава во четвртокот. „Ќе ги објасниме фактите пред судот и сигурни сме дека ќе утврдиме дека обвинението на обвинителството е неосновано“.
Целта на Квон да создаде стабилна дигитална валута надвор од мејнстрим финансиите привлече инвеститори, но и критичари кои рекоа дека тоа е Понзи шема. Квон собра над милион следбеници на „Твитер“, каде понекогаш беше дрзок и борбен пред да замолчи кога стана цел на официјалните власти.
Квон ги негираше обвинувањата на Црна Гора за користење фалсификувани патни исправи. Минатата недела тамошниот суд повторно му одобри кауција. Сè уште не е јасно дали Црна Гора на крајот ќе го екстрадира Квон на Јужна Кореја или на САД.
„Разбираме дека процесот на екстрадиција може да потрае до девет месеци, во зависност од тоа колку долго осомничениот бил во притвор и така натаму“, рече Дан.
