.webp){kind=icon}
Србија се наведува како можна локација на крипто-бегалецот До Квон, пропаднат 31-годишен претприемач кој се соочува со обвиненија во неговата родна Јужна Кореја поради финансискиот крах што збриша дигитални средства од 60 милијарди долари.
Обвинителите од Сеул изјавија дека понеделничките извештаи кои креаторот на токените тера (Terra) и луна (Luna) го лоцираат во Србија „не се лажни“. Во овие извештаи се наведува и дека Јужна Кореја побарала соработка од Србија. Претставник на јужнокорејското Министерство за правда одби да коментира.
Локацијата на Квон стана нејасна откако властите издадоа налог за негово апсење кон средината на септември под обвинение за кршење на законите за пазарот на капитал. Јужна Кореја му го одзеде пасошот и објави дека Квон е предмет на црвена потерница на Интерпол.
Обвинителите во октомври посочија дека Квон одлетал во Дубаи, што можеби му е попатна станица, откако го напуштил Сингапур, каде што беше базиран неговиот проект „Тераформ лабс“ (Terraform Labs).
Стејблкоинот тера (УСД) требаше да одржува константна вредност од еден долар во рамки на систем заснован на алгоритми и стимулации на трговците, во кој беше вклучен и сестринскиот токен луна. Системот „пукна“ во мај, што само го влоши колапсот на криптопазарот кој веќе беше започнат, бришејќи две илјади милијарди долари, што пак придонесе за последователен пад на низа типови на дигитални средства.
Bloomberg
Квон ги отфрли обвинувањата, а „Тераформ лабс“ порача дека законот за пазарот на капитал не се применува на криптовалутите. Ниту тој, ниту портпаролот на „Тераформ лабс“ веднаш не одговориле на барањата за коментар за најновите случувања.
Горливо прашање е зошто Квон би бил во Србија и што би можело да значи тоа за неговите опции за екстрадиција. Јужна Кореја нема билатерален договор за екстрадиција со Србија, но двете земји имаат пристапено кон Европската конвенција за екстрадиција.
Точната причина за колапсот на проектот на Квон останува мистерија. Американските власти истражуваат можни врски со Сем Банкмен-Фрид, чијашто криптоберза FTX и трговската куќа „Аламеда рисрч“ (Alameda Research) неодамна паднаа во банкрот.
„Њујорк тајмс“ објави дека американските федерални обвинители истражуваат дали Банкмен-Фрид се вклучил во манипулација на пазарот преку оркестрирање на трговските активности што доведоа до „пукање“ на тера и луна.
