Биткоинот се искачи над 81.000 долари на крилата од ветувањата на Трамп

Биткоинот првпат надмина вредност од 81.000 долари, поттикнат од поддршката на новоизбраниот претседател Доналд Трамп за дигиталните средства и можноста за Конгрес со законодавци наклонети на криптото.

Трамп беше прогласен за победник во Аризона, освојувајќи ги сите седум клучни држави во САД. Неговата одлучна победа на претседателските избори предизвика славење во индустријата за дигитални средства, која потроши над 100 милиони долари за поддршка на различни кандидати што се пријателски настроени кон криптовалутите.

Најголемата криптовалута се зголеми за 6,1 отсто во неделата и продолжи да расте до невидени 81.891 долар во понеделникот, пред да се тргува за 81.550 долари во 5.10 часот во Лондон. Позитивниот сентимент ги подигна и помалите криптовалути, вклучувајќи го и доџкоин (Dogecoin), омилената криптовалута на поддржувачот на Трамп, Илон Маск.

„Со оглед на тоа што прашината од победата на Трамп сè уште слегнува, беше само прашање на време пред да се случи некаков раст, имајќи ја предвид перцепцијата дека Трамп е прокрипто ориентиран, и тоа е она што го гледаме сега“, рече Ле Ши, директор за пазари во фирмата „Аурос“ (Auros) во Хонгконг.

Агендата на Трамп

Трамп за време на кампањата вети дека ќе ги постави САД во центарот на индустријата за дигитални средства, вклучувајќи создавање стратегиски резерви на биткоин и назначување регулатори со позитивен пристап кон дигиталните средства. Веселите трговци моментално не обрнуваат многу внимание на прашања како брзината на веројатната имплементација или дали стратегиската резерва е реална можност.

Неговата поширока агенда за поттикнување на домашниот економски раст, намалување на даноците и намалување на бирократијата предизвика купување акции, кредити и криптовалути. Индексот S&P 500 минатата недела го достигна својот 50-ти рекорд годинава.

Биткоинот додаде околу 94 отсто досега во 2024 година, помогнат од силната побарувачка за американските биткоин-фондови со кои се тргува на берза и намалувањето на каматните стапки од страна на Федералните резерви. Растот на криптовалутата, која првпат достигна нов рекорд по изборите во САД во вторникот, ги надминува приносите од инвестиции како акции и злато.

Фондовите за тргување, поддржани од 35 милијарди долари вредниот iShares Bitcoin Trust на „Блекрок“ (BlackRock Inc.), забележаа рекорден дневен нето-прилив од речиси 1,4 милијарда долари во четвртокот, според податоците собрани од „Блумберг“. Ден порано, обемот на тргување на истиот фонд достигна врв на сите времиња - уште еден показател како победата на Трамп го преобликува криптопазарот.

„Веруваме дека значителен дел од институционалниот пазар се ослободи од ризикот пред изборите и сега повторно влегува по победата на Трамп, создавајќи материјален притисок за купување - тоа веројатно ќе продолжи уште некое време“, рече Ричард Галвин, основач на фирмата за инвестиции во криптовалути ДАЦМ (DACM).

Ставот на Трамп е во контраст со репресијата врз дигиталните средства под претседателот Џо Бајден. Претседателот на Комисијата за хартии од вредност и берзи, Гери Генслер, постојано го означуваше секторот како полн со измами и неправилности. Агенцијата ги заостри мерките против криптовалутите по пазарниот колапс во 2022 година и низата банкроти, особено на измамничката криптоберза FTX на Сем Банкмен-Фрид.

Компаниите за дигитални средства потрошија многу за време на изборната кампања за да ги поддржат кандидатите што се гледаат како поволни за нивните интереси. Во тој контекст, Трамп направи пресврт, станувајќи поддржувач на индустријата што некогаш ја означуваше како измама.

„Трамп вети поддржувачка регулација, а освојувањето на Претставничкиот дом и Сенатот ја прави веројатноста за донесување закони за криптовалути многу поголема“, напиша Ноел Ачесон, авторка на билтенот „Крипто е сега макро“ (Crypto Is Macro Now).

Во моментов нема коментари за веста. Биди прв да коментира...

Остави коментар