Биткоинот потона откако извршната наредба на Трамп го разочара пазарот

Тензиите во криптоиндустријата повторно испливаа на површина откако претседателот Доналд Трамп ја потпиша долгоочекуваната уредба за создавање стратегиска резерва од биткоини и дополнителна резерва од други дигитални средства.

Иако извршните криптодиректори објавија пофални зборови на социјалните мрежи за овој потег, биткоинот падна дури за 5,7 отсто. Најголемото дигитално средство ги намали загубите на околу 3,2 отсто, тргувајќи на 88.567 долари од 7.10 часот во Лондон.

Четири други дигитални токени што претходно беа истакнати од Трамп - етер, XRP, кардано и солана - исто така забележаа падови.

Иако создавањето специфична резерва од биткоини го исполнува ветувањето што Трамп го даде за време на кампањата, деталите не ги исполнија очекувањата на индустријата.

Уредбата, првично споделена како објава на X од страна на криптоцарот на Белата куќа, Дејвид Сакс, укажуваше дека владата нема да користи пари од даночните обврзници за финансирање на стратегиската резерва од најголемото дигитално средство.

Наместо тоа, резервата ќе биде капитализирана со биткоини веќе во сопственост на федералната влада. Секоја понатамошна аквизиција ќе бара „буџетско неутрални стратегии за стекнување дополнителен биткоин, под услов тие стратегии да не им наметнуваат дополнителни трошоци на американските даночни обврзници“, се наведува во уредбата.

Исто така, САД нема да продаваат биткоин депониран во резервата, според наредбата.

Стефан фон Хениш, директор за тргување во криптофирмата „Битго“ (Bitgo Inc), рече дека потенцијалниот недостиг од нови купувања влијае на пазарот.

„Претходно инвеститорите влегуваа на пазарот со очекување владата да купува биткоин. Со оваа најнова развојна ситуација, овие позиции се одмотуваат“, рече тој.

Условите околу резервите на други криптосредства се уште построги.

Според уредбата, владата нема да стекнува дополнителни криптосредства за резервата „освен оние добиени преку постапки за конфискација“.

Криптосредба во Вашингтон

И за разлика од барањето да не се продава биткоин, наредбата експлицитно забележува дека Министерството за финансии „може да одреди стратегии за одговорно управување, вклучувајќи потенцијални продажби“ од резервата.

САД моментално поседуваат околу 16,4 милијарди долари вредност на биткоин и околу 400 милиони долари вредност во седум други токени, главно поради конфискации на средства поврзани со граѓански и кривични случаи.

Наредбата доаѓа непосредно пред собирот на извршните криптодиректори во Вашингтон. Дваесетина претставници на компании, вклучувајќи ги „Коинбејс“ (Coinbase Global Inc.) и „Робинхуд“ (Robinhood Markets Inc.), се на пат кон Белата куќа за да се сретнат со Трамп и со Сакс.

„Значењето на оваа извршна наредба е главно симболично, бидејќи ова е првпат биткоинот формално да се признае како резервно средство на владата на Соединетите Американски Држави“, рече Ендрју О’Нил, генерален директор за дигитални средства во „СП глобал“ (S&P Global Ratings).

Различни судбини

Ветувањето на Трамп за создавање стратегиска резерва од биткоини беше едно од многуте ветувања дизајнирани да ја привлечат индустријата што се појави како извор на значајни политички донации.

Тоа ветување, заедно со неговото ветување да го отпушти Гери Генслер од неговата тогашна улога како претседател на Комисијата за хартии од вредност на САД, помогна да се поттикне пораст на цените на токените пред неговата инаугурација.

Но расположението на пазарот се сврте во негативно во февруари, кога инвеститорите реагираа на вестите за царини, хакерскиот напад од 1,5 милијарда долари на крипто и одливи од ЕТФ-овите за дигитални средства.

Потоа Трамп предизвика интензивен но краткотраен раст за време на викендот, кога на Трут (Truth Social) порача дека солана (SOL), кардано (ADA) и XRP ќе бидат вклучени во плановите на владата заедно со биткоинот и етерот.

Поддржувачите на биткоинот реагираа со разочарување на објавата на социјалните мрежи во тоа време, критикувајќи го вниманието што го добиваат другите помалку етаблирани токени.

Во моментов нема коментари за веста. Биди прв да коментира...

Остави коментар