„Коинбејс“ ќе влезе во S&P 500 – клучен момент за крипто индустријата

Акцијата на „Коинбејс“ (Coinbase Global Inc.), најголемата американска крипто - берза, ќе биде додадена во индексот S&P 500, што претставува важен пресврт за растечката индустрија на дигитални средства.

Компанијата ќе ја замени „Дискавер Фајненшл Сервисис“ (Discover Financial Services) во индексот пред почетокот на тргувањето на 19 мај, соопштија од S&P Dow Jones Indices. Акциите на „Коинбејс“  пораснаа за 13 отсто во тргувањето по работното време.

Вклучувањето на „Коинбејс“ се смета за своевидна сатисфакција  за крипто поддржувачите, кои одиграа значајна улога во победата на претседателот Доналд Трамп на изборите во ноември.

„Ова е знак на времето,“ рече Ден Долев, сениор аналитичар за плаќања во „Мизухо“ (Mizuho). „Тоа е добредојде за крипто акциите во мејнстримот.“

Додавањето на „Коинбејс“ доаѓа откако „Капитал Уан Фајненшл“ (Capital One Financial Corp.) доби одобрување од американските регулатори да ја купи „Дискавер Фајненшл Сервисис“ — зделка со која се креира најголемиот издавач на кредитни картички во земјата според обемот на заемите.

„Ова е силен сигнал дека дигиталните средства цврсто влегуваат во финансискиот мејнстрим,“ изјави Дејвид Шаслер, директор за мулти-активни решенија во инвестициската фирма „ВанЕк“ (VanEck). „Овој потег ја отсликува пошироката промена во начинот на кој традиционалните пазари почнуваат да ја признаваат и интегрираат крипто-инфраструктурата.“

Bloomberg Mercury

 

Откако стана прва голема американска крипто-компанија котирана на берза пре речиси четири години преку директно листирање— акциите на „Коинбејс“ пораснаа за околу 260 отсто во последниве две години, со пазарна вредност од околу 53 милијарди долари. Сепак, зад тој раст стои нестабилен пат: индустријата беше погодена од скандали и банкроти, како колапсот на „Еф-Ти-Екс“ (FTX) во 2022 година. Последниве месеци, акциите на „Коинбејс“ паднаа за речиси 17 отсто, за разлика од порастот од речиси 10 отсто кај биткоинот.

Во првиот квартал од годинава, приходите на „Коинбејс“ пораснаа за 24 отсто во споредба со истиот период лани, но беа за 10 отсто пониски во однос на четвртиот квартал. Нетo добивката падна за 94 отсто, на 66 милиони долари, претежно поради ревалоризација на крипто средствата според пазарната цена.

„Коинбејс“ исто така објави планови за преземање на „Дерибит“ (Deribit), најголемата светска платформа за тргување со опции на биткоин и етер, за 2,9 милијарди долари. Ова е една од најзначајните аквизиции во историјата на крипто - индустријата и доаѓа во време кога враќањето на Трамп во Белата куќа поттикнува нов бран на спојувања и преземања.

Претседателот назначи поддржувачи на дигитални средства на клучни владини позиции и донесе политики во корист на индустријата, вклучително и прекин на неколку регулаторни постапки.

„Сите овие крипто-поврзани случаи на Комисијата за хартии од вредност се повлекуваат многу брзо. Се создава пријателска регулаторна средина,“ рече Долев од „Мизухо“. „Нема притисок да се воведе нова регулатива, бидејќи администрацијата е отворена кон крипто.“

За да се квалификува за вклучување во S&P 500, компанијата мора да има пазарна капитализација од најмалку 20,5 милијарди долари, како и да исполнува критериуми за профитабилност, ликвидност и слободно тргување со акции, според методологијата од март.

Вклучувањето во американскиот берзански бенчмарк  може значително да го зголеми профилот на компанијата, особено со растот на пасивното инвестирање. Од друга страна, исфрлањето од индексот може негативно да влијае врз акциите, бидејќи индексните  фондовите ги продаваат акциите за да се прилагодат на новиот состав.

Во мартовското квартално ребалансирање, во S&P 500 беа додадени „ДорДаш“ (DoorDash Inc.), „Вилијамс – Сонома“ (Williams-Sonoma Inc.), „ТКО Груп Холдингс“ (TKO Group Holdings Inc.) и „Експанд Енерџи Корп.“ (Expand Energy Corp.)

Во моментов нема коментари за веста. Биди прв да коментира...

Остави коментар