Доларот скокна на највисоко ниво во последните 10 дена откако се интевизираа тензиите меѓу САД и Иран

Доларот скокна откако новите извештаи за интензивирање на непријателствата на Блискиот Исток го намалија оптимизмот за потенцијалниот крај на конфликтот.

Bloomberg Dollar Spot Index порасна за дури 0,3 проценти на највисоко ниво од 13 април во четврток, пред да се намали. Сите валути во Групата 10 паднаа во однос на доларот, а новозеландскиот долар ги предводеше загубите. Растењето на тензиите ги зголеми цените на нафтата, при што Брент накратко надмина 107 долари за барел.

„Нафтата се зголемува и го носи доларот со себе“, рече Ендру Хазлет, трговец со девизи во „Монекс“ (Monex Inc). „Трговците сметаат дека ескалацијата на тензиите во последните неколку дена укажува дека крајот на конфликтот повеќе не е на хоризонтот.“

Еврото ослабе за дури 0,3 проценти на 1,1669 долари во четврток, бидејќи регионот е многу зависен од снабдувањето со енергија од Блискиот Исток.

Доларот како засолниште напредуваше трет ден по ред, бидејќи тензиите меѓу САД и Иран се зголемија над Ормускиот Теснец, при што двете страни ги одржуваат своите блокади на критичниот воден пат. Доларот закрепна во март, но изгуби дел од силата кога беше објавено примирјето, оттогаш надежите за решавање на војната во блиска иднина речиси исчезнаа.

„Блокадата на САД и иранската активност во Ормуз ги зголемуваат ризиците од повторна ескалација“, рече Аруп Чатерџи, стратег во „Велс Фарго“ (Wells Fargo). „Ништо од ова не го решава континуираниот шок на снабдување кој ќе станува позначаен колку подолго трае. Пазарната самодоволност се тестира овде.“