.webp){kind=icon}
Кремастата палата на Роман Абрамович во Кенсингтон со десетина спални соби ја чуваат полициски комбиња поставени на двата краја од улицата. Во блиското соседство живеат членови на британското кралско семејство, магнатот за челик, Лакшми Митал и сопственикот на „Ворнер мјузик груп“ (Warner Music Group), Лен Блаватник.
Тоа е еден од неколкуте лондонски имоти што рускиот милијардер ги стекна во последните децении и преку кои градот стана центар на неговото богатство. Но, таа основа се покажа слаба во последниве месеци бидејќи неговиот имот во англиската престолнина, од фудбалскиот клуб Челзи, преку луксузните домови, до уделот во групацијата за челик со седиште во Лондон, „Евраз“ (Evraz Plc), беше продаден или замрзнат по руската инвазија на Украина.
Последниот удар за Абрамович, кој во март беше санкциониран од Британија и Европската унија, дојде минатиот месец кога „МХЦ“ [MHC (Services) Ltd.], која работеше како дел од неговата семејна канцеларија пред конфликтот, поднесе барање за ликвидација. Неговиот главен имот во Лондон вредеше околу 4 милијарди фунти (4,8 милијарди долари) пред инвазијата, речиси една третина од неговото целокупно богатство во тоа време, според индексот на милијардери на Bloomberg.
Bloomberg
„Тој веќе не е на врвот на кој што беше“, вели Дејвид Лингелбах, кој ги предводеше руските операции на „Банка на Америка“ (Bank of America Corp.) во 90-тите, а сега предава на Универзитетот во Балтимор. „Ми се чини дека тој е во дефанзива“, додава професорот.
Абрамович (55), кој се обиде да посредува за мир меѓу Русија и Украина и се бори против санкциите на ЕУ, беше меѓу најпознатите руски олигарси кои инвестираа милијарди во економијата на Лондон по распадот на Советскиот Сојуз.
Во 2003 тој го купи фудбалскиот клуб „Челзи“ за 140 милиони фунти и обезбеди повеќе од милијарда фунти во финансирање пред да го продаде во мај, во договор проверен од британската влада, при што дел од средствата беа наменети за помош во Украина. Новата сопственичка група, предводена од Тод Боли, се согласи да плати 2,5 милијарди фунти и вети уште 1,75 милијарди фунти за дополнителни клупски инвестиции.
Непосредно пред да се појави на списокот за санкции на Британија, Абрамович се обидел да се одлободи од два имота во Лондон, изјави британскиот пратеник Крис Брајант во Парламентот. Едниот бил неговата вила во Кенсингтон, според извор запознаен за ова прашање, додека другиот бил пентхаус на Челзи Вотерфронт. Абрамович не може да ги продаде имотите додека е под санкции од Британија, а сите пари што ги има во земјата остануваат замрзнати на сметките.
Олигархот исто така не може да го продаде својот удел во „Евраз“, неговиот најголем имот на листата пред конфликтот. Акциите на компанијата, која беше санкционирана од Британија во мај, паднаа за 87 отсто оваа година пред да бидат замрзнати набргу откако тој беше ставен на владината листа.
Обнова на друго место
„Дури и во неверојатно сценарио санкциите да бидат укинати, ќе му биде многу тешко да најде начин да се врати во Британија и Европската унија“, смета Лијана Семчук, аналитичарка за Евроазија во советодавната фирма „Сибилајн“ (Sibylline) во Лондон. „Можеби ќе треба да ја обнови својата империја на друго место“, констатира таа.
Абрамович почна со своите инвестиции во Лондон во раните 2000-ти, откако натрупа богатство од продажбата на приватизираните средства стекнати од поранешниот Советски Сојуз, вклучувајќи го и нафтениот гигант „Сибнефт“.
Кон крајот на 2001 година ја основа лондонската филијала на неговата семејна канцеларија „Милхаус“ (Millhouse) и ги прати своите деца во англиски училишта. Исто така, се здоби со пентхаус во Лондон, имот во Сасекс и домови во Белгравија. Неговите посети во Британија зачестија откако го купи Челзи во истата година кога го продаде најголемиот дел од својот алуминиумски имот на колегата олигарх, Олег Дерипаска.
Надвор од Британија, имотот на Абрамович вклучува домови во Франција и Русија, како и суперјахти и приватни авиони, кои сега се предмет на правна борба во САД поради наводните прекршувања на санкциите. Дополнително, тој го обезбеди најголемиот дел од 6 милијарди долари зад Конкорд Менаџмент, кои ги искористи за да инвестира во повеќе од 100 хеџ фондови и приватни фирми кои се обидуваат да го растоварат неговиот капитал.
Побезбедни води
Абрамович премести две од неговите јахти во турски води по инвазијата за да избегне евентуални заплени на имот во Европа. Тој, исто така, годинава разгледуваше куќи на ексклузивниот архипелаг Палма Џумеира во Дубаи, велат извори запознаени со тоа прашање, додека неговите приватни авиони од март се во Дубаи или Москва.
На почетокот на војната, Абрамович се сретна со Путин и доби одобрение од претседателот да продолжи со мировните преговори, тврдат два упатени извора. Се вели дека Абрамович првично бил оптимист во врска со изгледите за договор, и покрај тоа што претрпе сомнителен напад со труење по дискусиите во Киев на почетокот на март.
Разговорите потоа заглавија, иако земјите бележат некој дипломатски напредок, постигнувајќи договор минатиот месец за да помогнат во зајакнувањето на глобалните резерви на храна.
Граѓанин на светот
Абрамович доби израелско државјанство во 2018 година кога ги одложи плановите за нов стадион на Челзи. Во 2021 година, тој стана португалски државјанин според законот кој нуди натурализација на потомците на сефардските Евреи кои биле протерани од Пиринејскиот Полуостров. Португалија отвори истрага за одлуката.
Во Лондон, неговото појавување на натпреварите на Челзи стана поретко, при што клубот нема евиденција дека Абрамович ги користел ексклузивните простории за следење на натпреварите од 2018 до 2021 година.
Абрамович ја стекна својата палата во Кенсингтон Сквер Гарденс, во близина на официјалната резиденција на војводата и војвотката од Кембриџ, за околу 90 милиони фунти во 2009 година. Оттогаш тој изврши обемно реновирање на некогашната советска амбасада.
Во моментот, има малку знаци за активност во куќата. Репортерите нодамна забележаа градинар во зелен комбинезон кој ги наводнуваа цвеќиња во близина на влезот. Ниту едно возило не било паркирано покрај големата камена патека. За разлика од соседните имоти, сите завеси и ролетни се целосно спуштени.
„Санкциите требаше да создадат незадоволство кај олигарсите како Абрамович и да ги натераат да извршат притисок врз Путин“, вели Семчук од Sibylline. Но, кога Лондон е затворен за него, „тој сега е уште позависен од Путин бидејќи санкциите го враќаат назад во Русија“, додава таа.
