Пазарите се претпазливи пред интервенцијата за сопирање на падот на јенот

Трговците ќе ја започнат неделата со зголемена будност за можната интервенција на јапонската влада која има за цел да го запре слабеењето на јенот - можеби со ретка помош од САД - откако премиерката Санае Такаичи предупреди за акција против ненормалните движења.

Шпекулациите за интервенција растат откако трговците пријавија за време на петочната трговска сесија во САД дека Федералната резервна банка на Њујорк контактирала финансиски институции за да праша за девизниот курс на јенот. Главниот јапонски валутен офицер претходно тој ден одби да коментира дали е спроведена проверка на курсот од нивна страна.

„Проверките на курсот обично се последно предупредување пред да се преземе таква акција,“ рече Мајкл Браун,  истражувачки стратег во „Пеперстон груп“, мислејќи на интервенцијата. „Администрацијата на Такаичи изгледа има многу, многу помала толеранција за шпекулативни девизни движења отколку претходниците.“

Извештаите за проверката на курсот веројатно ќе го направат пазарот претпазлив за дополнителното слабеење на  јапонската валута, притискајќи ги кратките позиции на јенот, кои бележат најголемо зголемување во повеќе од една деценија. Јенот силно осцилираше во последните часови од тргувањето минатата недела, враќајќи се од пад до ниво последен пат видено во 2024 година, пред да добие до 1,75 отсто и да достигне 155,63 за долар. Тоа беше најголемиот еднодневен раст од август.

Bloomberg Mercury

„Не е мое како премиер да коментирам за прашања кои треба да се одредат од пазарот, но ќе ги преземеме сите неопходни мерки за да се справиме со шпекулативни и високо ненормални движења,“ рече Такаичи за време на телевизиска дебата меѓу лидерите на партиите во неделата.

Таа не прецизираше на кој пазар се однесуваат нејзините забелешки. Владините официјални лица неодамна предупредија и за приносите на обврзниците и за јенот. Приносите на обврзниците со најдолг рок достигнаа рекорди во првиот дел од минатата недела пред да се повлечат.

„Со оглед на коментарите на Такаичи, трговците треба да бидат многу внимателни при отворањето во понеделник,“ рече Ник Твидејл, главен аналитичар во „АТ Глобал маркетс“ во Сиднеј. Тој додаде дека јапонската валута може да се тргува околу 155 за долар на почетокот од неделата.

Пресвртот во падот на јенот започна откако гувернерот на Банката на Јапонија, Казуо Уеда, ја заврши својата прес-конференција по одлуката за монетарната политика во петокот. Неколку часа подоцна, Ацуши Мимура, главниот офицер во Министерството за финансии задолжен за јенот, одби да коментира дали владата интервенирала за да ја поддржи валутата.

Добивките на јенот се забрзаа за време на сесијата во САД, при што Волстрит ја гледаше проверката на курсот како можен чекор за подготовка на Јапонија да интервенира за да го зајакне јенот, можеби дури и со приклучување на американската влада.

 „Пазарот дефинитивно сака да биде краток на јен, но ќе биде многу претпазлив со оглед на ова предупредување - и ако видиме дека американската страна е вклучена во можни проверки на курсот, влијанието може да биде многу значајно, не само за јенот, туку и за глобалните пазари,“ рече Твидејл.

За некои трговци, координирана акција од Јапонија и САД потсетува на договорот од 1985 година меѓу неколку од најголемите светски економии кој ефективно го девалвираше доларот. Дискусијата за политички одговор за исправање на економските нерамнотежи предизвикани од „постојана преценетост на доларот“ се појави пред повеќе од една година.

САД имаат интервенирано на девизните пазари само три пати од 1996 година, според веб-страницата на Федералната резервна банка на Њујорк, последен пат продавајќи јен заедно со другите земји од Групата на седум за да помогнат во стабилизирање на тргувањето по земјотресот во Јапонија во 2011 година.

„Јапонија не може да го поправи јенот без да ризикува домашен притисок или глобални последици, па идејата за координација, некаков втор договор, одеднаш не изгледа луда за некои,“ рече Ентони Дојл, главен инвестициски стратег во „Пинакл инвестмент менаџмент“. „Кога американското Министерство за финансии почнува да врши повици, тоа обично е знак дека ова веќе не е нормална девизна приказна.“

Јапонската влада потроши речиси 100 милијарди долари на купување јен за да ја поддржи валутата во 2024 година. На секоја од четирите прилики курсот на јенот беше околу 160 за долар, поставувајќи го тоа ниво како груб маркер каде што повторно би можела да се случи акција.

„На крајот, ако ова е вистински обид да се закотви курсот, Токио мора да следи со вистинска интервенција,“ рече Хомин Ли, макро стратег во „Ломбард одиер“. Тој додаде дека и Јапонија и САД да влезат на пазарот би било „невообичаено отворено прикажување на билатерална координација.“

Bloomberg Mercury

„160 е едноставен, заокружен број кој пробива низ бучните политички наслови за многу јапонски гласачи и пазарни коментатори кои сигурно ќе го третираат како некаков голем кризен индикатор пред предвремените избори за долниот дом во февруари,“ рече Ли.

Јапонија се подготвува за вонредни избори на 8 февруари, со ветувањето на Такаичи за намалување на даноците на храната кое предизвика потреси на јапонскиот пазар на долгови во последните денови. Приносот на 40-годишните обврзници скокна над 4 отсто до нов рекорд од нивното воведување во 2007 година и првпат за било која доспеаност на државниот долг на земјата во повеќе од три децении.

„Интервенцијата само го одложува, но не го поништува трендот на депрецијација на јенот во тековната макро поставеност каде што фокусот е на зголемено фискално трошење,“ рече Ронг Рен Го, портфолио менаџер за фиксни приходи во „Естспринг инвестментс“.