Нафтата и природниот гас го продолжија падот поради надежите дека САД и Иран се блиску до мировен договор кој би ставил крај на војната што ги потресе енергетските пазари.
Американската сурова нафта Вест Тексас падна за дури 5,1 отсто на најниско ниво во речиси два месеца, додека европските фјучерси на природен гас загубија до 8,4 отсто. Иранската полуофицијална новинска агенција Мехр објави дека нацрт-договорот од 14 точки меѓу САД и Иран предвидува укинување на санкциите за извоз на нафта. Според извештајот, договорот сè уште треба да биде одобрен од иранските власти.
Американскиот претседател Доналд Трамп претходно изјави дека мировен договор со Иран би можел да биде потпишан веќе викендов, откако ги откажа претходно најавените напади врз земјата.
Ризиците за бродскиот сообраќај во Ормутскиот Теснец и натаму остануваат. Телевизијата Фокс Њуз објави дека американските сили во текот на ноќта собориле два ирански дрона кои, според извештајот, изгледале како да таргетираат трговски бродови. Иран соопшти дека теснецот ќе биде затворен за сите видови пловни објекти по последните непријателства со САД, иако во последните недели е забележан пораст на бројот на бродови што го напуштаат Ормут.
Американскиот претседател и претходно десетици пати тврдеше дека договор со Иран е на дофат, но ниту еден досега не е реализиран.
„Се чини дека пазарот сè повеќе се обложува дека двете страни на крајот имаат повеќе да изгубат од неуспех отколку од компромис“, изјави Харис Куршид, директор за инвестиции во чикашката компанија „Каробар капитал“ (Karobaar Capital LP).
„Тоа не значи дека договорот е блиску. Тоа само значи дека пазарот повеќе не го смета пропаѓањето на преговорите за најверојатен исход“, додаде тој.
Трамп им изјави на новинарите дека потпишувањето би можело да се случи веќе овој викенд во Европа и дека потпретседателот Џеј Ди Венс ќе присуствува ако се постигне договорот. Тој исто така рече дека врховниот лидер на Иран се согласил на договор, но предупреди дека тој сè уште не е финализиран.
Според извештајот на агенцијата Мехр, САД би ги повлекле силите од подрачјето во близина на Иран, а Ормутскиот Теснец би бил повторно отворен во рок од 30 дена. Агенцијата се повикува на извор близок до преговарачкиот тим.
.webp){kind=icon}
