text size
Ниската цена на берзата и топлото време се причина власта да тактизира со набавката на гас за претстојната зима. Од утре во функција ќе биде ставена комбинираната централа ТЕТО, која ќе произведува и струја, но и топлинска енергија. Според извори на „Блумберг Адрија“, менаџментот на компанијата во петокот склучил поволен договор за набавка на гас преку својот постојан снабдувач само за ноември. Тоа значи дека за следниот месец се обезбедени 60 отсто од потребите на Скопје за топлинска енергија.
Преостанатите 40 отсто, само за ноември, најверојатно ќе бидат обезбедени преку „Макпетрол“, единствената компанија што доставила целосна понуда на тендерот што го распиша ЕСМ. Сепак, нема прецизна информација дали домашната компанија ќе обезбеди дел или целото потребно количество за следниот месец.
Понуди доставиле уште две странски компании, но тие сѐ уште не ја комплетирале документацијата со која треба да докажат со колкави количества располагаат, од каде ќе го обезбедуваат гасот итн.
Од ЕСМ цела недела, колку што доцни целата постапка, повторуваат дека деталите за набавката ќе ѝ бидат познати на јавноста тогаш кога ќе биде избрана компанијата, но дека скопјани не треба да се грижат, затоа што греење ќе има.
Цените на гасот минатата недела паднаа под 100 долари
Познавачите на состојбите велат дека изборот доцни затоа што власта тактизира. Топлото време е причина топланите да не мора да работат со полн капацитет, што значи се штеди енергент.
Другата причина е моменталната ниска цена на гасот. Извори од Министерството за економија, за „Блумберг Адрија“ велат дека токму поради цените се прават напори да се обезбедат количества по многу поповолни услови.
„Гасот што ќе го набавиме ќе биде двојно поевтин од тој што го набавивме во септември“, вели нашиот извор.
И топлинската енергија што ќе биде обезбедена преку ТЕТО ќе биде со пониска цена од регулираната, велат за „Блумберг Адрија“ владини извори.
Минатата недела на светските берзи цената на гасот падна под 100 долари за мегават-час, првпат по јуни годинава.
Фјучерсите на гасот паднаа за цели 12 отсто и се за околу 70 отсто пониски од августовскиот врв. Се очекува температурите над нормалата да се задржат низ континентот до крајот на месецот, што ќе ја одложи грејната сезона и ќе овозможи полнење на складиштата. Високите нивоа на увоз на течен природен гас помогнаа резервите да бидат повисоки од вообичаеното.
Но, и покрај поволната цена на гасот, од ЕСМ и натаму ја туркаат тезата дека ако не се обезбеди гас, топланите ќе работат на дизел, за што компанијата веќе ги прави сите подготовки. Познавачите на прашањата позврзани со животната средина за „Блумберг Адрија“ велат дека иако овој енергент е помалку штетен од мазутот, сепак не треба биде опција, затоа што е загадувач.
Дали ТЕТО ќе произведе струја за домашните компании?
Останува отворено и прашањето за кого ќе биде струјата што ќе ја произведува ТЕТО. Барањата на бизнисот беа централата да обезбедува поевтина струја за домашните компании. Дали централата ќе го обезбедува енергентот по поволна цена за стопанството ќе се знае по ноември, затоа што дотогаш треба се види дали власта ќе обезбеди гас за ТЕТО.
Преговори се водат и со Србија, која преку Бугарија би испорачувала гас во земјава, а за возврат би добивала струја од ТЕТО. Но се разговара и со турски фирми.
Додека се најде решение за околу 1.600 компании што се на слободниот пазар и плаќаат берзанска цена на струјата, власта го реши проблемот само за прехранбените фирми.
Државата од декември ќе ги префрли на „ЕСМ продажба“, компанијата што обезбедува струја за регулираниот пазар, и ќе плаќаат 80 евра за мегават-час, за да ги намалат цените на храната.
На унгарската берза, цената на струјата иако е пониска од врвот што го достигна летоска, сепак е многу нестабилна. Па, така, во четвртокот се искачи на 170 евра за мегават, во саботата падна на 103, а денеска се тргува по цена од околу 145 евра за мегават-час.
.webp){kind=icon}
