Пченицата поскапе за дури 7,7 отсто откако Русија се повлече од договорот

Фјучерсите на пченицата пораснаа откако Русија се повлече од договорот со кој се дозволуваше извоз на житарици од Украина преку Црно Море. Таквиот договор се сметаше за клучен фактор за ублажување на ограничените светски резерви и за контролата на трошоците за храна низ светот.

Русија го суспендира учеството во договорот во саботата, откако дрон ја нападна нејзината поморска флота, тврдејќи дека е можно еден од дроновите да дошол до бродот за транспорт на жито што веќе било договорено за извоз.

Пченицата на берзата во Чикаго скокна за 7,7 проценти, на 8,9325 долари, а на берзата во Сингапур порасна за 5,6 отсто. Пченката поскапе за 2,8 проценти, а соиното масло за три отсто. Најновиот пад на понудата може да ја поттикне светската инфлација на храната и да го зголеми гладот ако продолжи растот на цените.

Украина, Турција и Обединетите нации (ООН) се договорија денеска да испловат бродови што превезуваат храна од украинските пристаништа и така да се спротивстават на одлуката на Русија да се повлече од договорот. Руските делегати се известени, се наведува во соопштението на Обединетите нации. Трговците внимателно следат како ќе реагира Русија на ова.

„ООН заедно со Украина и Турција ќе продолжи да учествува во договорите за испорака на житни култури и покрај повлекувањето на Русија“, рече Џо Дејвис, директор за продажба на суровини во брокерската куќа „Фјучрс интернешнел“ (Futures International LLC), со седиште во Чикаго. Тој очекува дека пазарот на пченица и натаму ќе биде нестабилен додека трговците чекаат вести од Црно Море.

Движење на цената на пченицата / Bloomberg Mercury

 

Договорот беше потпишан во јули, со посредство на ООН и Турција, со што заврши петмесечната блокада на украинските пристаништа, а тоа резултира со намалени резерви во светот и доведе до рекордни трошоци за храна. Договорот е дизајниран да овозможи безбедно минување на житариците и семињата за масло, кои се меѓу најважните украински извозни производи.

Коридорот за житарици го ублажи притисокот од малите резерви во светот откако беше повторно отворен пред три месеци. Украина испорача повеќе од девет милиони тони житарици и други прехранбени производи, а цените на пченката и пченицата се повлекоа од нивните највисоки нивоа од пред половина годинава. Инаку, договорот истекува на 19 ноември, а надлежните од Москва претходно напоменаа дека можеби нема да го продолжат.

Извоз на житарици од Украина / Bloomberg Mercury

 

Вообичаено, светот се потпира на регионот околу Црно Море дури за повеќе од четвртина од извозот на пченица и јачмен, за околу петтина од потребните количества на пченка и најголем дел од испораките на сончогледово масло. Привремениот прекин на договорот за жито, исто така, може да го загрози главниот извозен пат на ѓубривата, на кои се потпираат огромни површини земјоделски посеви во светот.

Ниски резерви

Според состојбата на терен на 30 октомври, шест брода што превезуваат пченица, пченка и други суровини го започнаа своето патување од Украина, но не влегоа во коридорот, соопштија од ООН. Уште не е видливо движењето на кој било брод во коридорот, покажуваат податоците на „Блумберг“.

„Ќе недостига малку од житото од Украина на светските берзи. Никој не сака да се потпре на тоа дека ќе се извлечат житарици оттаму ако веќе не се на вода“, рече Тобин Гореј, стратег во Комонвелт банк (Commonwealth Bank of Australia).

Пазарот ќе мора да бара житарици од друго место. „А од каде ќе дојдат? Па, нема многу резерви“, рече Гореј, додавајќи дека резервите во светот се мали, а главните извозници, Русија и Австралија, работат со полн капацитет.

Пченицата се тргува по цена од 8,76 долари, што е значајно под највисокиот дневен рекорд по руската инвазија врз Украина, кога во март чинеше 13,635 долари. Фјучерсите веројатно во октомври ќе забележат загуби од пет проценти, делумно поради намалените грижи за светската понуда.

Во моментов нема коментари за веста. Биди прв да коментира...

Остави коментар