.webp){kind=icon}
Нафтата поскапе откако резервите на сурова нафта во САД се намалија, но пазарот избегна какви било големи поместувања пред најновата одлука на американските Федерални резерви (ФЕД) за каматните стапки.
Фјучерсите ВТИ (West Texas Intermediate - WTI) се приближија кон 90 долари за барел, по неколкукратно преминување од зоната на загуби во зоната на добивки и обратно. Конкретно, ВТИ за испорака во декември поскапе за 1,27 долар и сега барел нафта чини 89,64 долари, додека цената на нафтата брент за испорака во јануари се покачи за 1,34 долар, на 95,99 долари за барел.
Bloomberg Mercury
Резервите на сурова нафта во САД паднаа минатата недела за 3,12 милиони барели, додека резервите на бензини паднаа на најниско ниво од ноември 2014 година, покажува извештајот на Управата за енергетски информации, објавен денеска.
Пазарот во текот на денешното тргување ќе ја следи и одлуката на ФЕД за каматните стапки, за да може да направи процена за побарувачката. Се очекува дека централната банка ќе пристапи кон четврто по ред зголемување на референтната каматна стапка, овој пат за 75 базични бодови. Додека трговците бараат знаци за брзината на економскиот раст, некои од портфолио-менаџерите велат дека Европа е блиску до рецесија.
„Образецот на тргување беше навистина променлив по овие одлуки на ФЕД. Пазарот е поставен како да ќе се покачат каматите за 75 базични бодови, но мислам дека начинот на кој се зборува за состанокот во декември веројатно ќе биде нешто позначајно за пазарот“, вели Мет Сали, портфолио-менаџер во „Тортојс“ (Tortoise), компанија што управува со имоти поврзани со енергија во вредност од околу осум милијарди долари.
Иако нафтата заздраве во ова тримесечје, по одлуката на Организацијата на земји извознички на нафта и нивни сојузници, ОПЕК+, да го намалат производството од ноември, пазарот во последниве денови се бори да пронајде насоки среде ослабеното тргување. Кратењето на производството од страна на ОПЕК+ ќе биде на некој начин попречено или отежнато од санкциите на Европската Унија (ЕУ) за руската нафта, бидејќи дополнително ќе ги замати прогнозите за испорака.
