.webp){kind=icon}
Францускиот енергетски регулатор апелира домовите и компаниите да ја намалат потрошувачката на енергија за да се избегне недостиг од струја во текот на зимата. Земјата влегува во сезона на греење само со половина од своите нуклеарни капацитети на мрежата, а испораките на руски гас се ограничени.
Мрежниот оператор РТЕ предупреди дека ограничувањето на производството, во услови кога беше принуден на увоз на електрична енергија по неверојатно високи цени, може да доведе до повремено исклучување на струјата во случај на многу ладно време.
„Ако бидеме разумни во потрошувачката, особено во станбените единици и канцелариите, тоа ќе ја олесни зимата“, рече Емануела Варгон, претседателка на Комисијата за регулирање во енергетскиот сектор, во интервју за Блумберг ТВ. „Франција може да избегне голем недостиг од струја сѐ додека луѓето умерено користат енергија“, додаде таа.
Владата постави цел да ја намали потрошувачката на енергија кај компаниите и јавните претпријатија за 10 проценти во текот на следните две години. Веќе е постигнат одреден напредок, а податоците за последните четири недели покажуваат дека потрошувачката на електрична енергија е за 6,8 проценти помала од нивото пред ковид, бидејќи производителите ја намалија потрошувачката на струја.
Националните проблеми со електричната енергија се шират и во соседните земји, кои се принудени да користат повеќе гас за производство на струја во недостиг од увоз од Франција. Топлото време во почетокот од грејната сезона значајно помогна и ги остави складиштата со гас низ регионот речиси полни, но, сепак, обновувањето на резервите за следната зима ќе биде потешко без руските резерви, смета Варгон. „Работиме на тоа со големите компании низ Европа“, рече таа.
Енергетската криза на континентот ги поттикна владите да потрошат десетици милијарди евра за да ги заштитат домаќинствата и компаниите од растечките сметки за струја. Државите проучуваат повеќе начини за намалување на сметките за струја и гас, од заедничко купување до ограничување на цените, иако предложените мерки на ниво на цела Европа беа предмет на долготрајни политички несогласувања.
„Притисокот на Франција да ги ограничи цените на гасот што се користи во електроцентралите, систем што веќе е воведен во Шпанија и во Португалија, може да биде тешко да се прошири на остатокот од континентот поради противењето на големите корисници на гориво, како Германија“, рече Варгон. Земјите што трошат многу гас за производство на електрична енергија, исто така, може да бараат компензација за своите поголеми трошоци.
