.webp){kind=icon}
Германија прави процена на намалената цена на електричната енергија од шест центи за киловат-час или помалку за некои енергетски интензивни индустрии за да ги олесни трошоците откако минатогодишната криза ја потресе економијата што е богата со производство.
Мерката ќе чини меѓу 25 и 30 милијарди евра и ќе трае до 2030 година, се наведува во работната верзија на документот, кој вчера го објави Министерството за економија. Се тврди дека мерката е потребна за спас за одредени сектори, како и за зачувување на конкурентноста, при што цените на електричната енергија сè уште се за околу двојно повисоки од пред кризата.
Главниот извршен директор на „Фолксваген“ (Volkswagen AG), Оливер Блум, рече дека предлозите одат во вистинската насока.
„Станува збор за зајакнување на конкурентската сила на нашата земја и, дополнително, за атрактивноста на Германија како индустриска локација“, рече Блум во изјавата испратена по електронска пошта.
Европската индустрија бавно закрепнува од агресивната енергетска криза од минатата година, дури и откако трошоците паднаа од историските врвови постигнати во текот на летото. Германските цени на електричната енергија за следната година, кои претставуваат репер за Европа, во моментов се повеќе од двојно повисоки од предложената граница.
„На компаниите што ќе ги исполнуваат условите за субвенција ќе им бидат вратени трошоците за електрична енергија ако нејзината цена изнесува над шест центи за киловат-час. Со оглед на тоа што нивото се заснова на просекот на берзанските цени, може и дополнително да се намали. Тоа е огромен попуст“, рече министерот за економија Роберт Хабек.
За споредба, малите и средните фирми во Германија плаќаат околу 27 центи за киловат-час, според неодамнешните податоци од енергетската лоби-група БДЕВ (BDEW). Големите енергетски интензивни компании обично не ги објавуваат своите точни цени.
По објавата на ваквите вести, акциите на германските производители на хемикалии значително пораснаа, зголемувајќи го подиндексот Stoxx 600 Chemicals за повеќе од еден отсто во период помал од 15 минути.
„Ова е важен сигнал за нашата индустрија. Цената на индустриската струја ни помага да обезбедиме производство и создавање индустриска вредност и, уште подобро, да ја совладаме трансформацијата кон климатска неутралност. Цела Германија и Европа ќе имаат корист од ова“, рече Волфганг Гросе Ентруп, раководител на Здружението на германската хемиска индустрија.
Министерството за економија предложи финансирање на алатката од вонбуџетскиот фонд, создаден за да им помогне на компаниите за време на пандемијата, кој подоцна беше пренаменет за сузбивање на последиците од енергетската криза. Министерот за финансии Кристијан Линднер се спротивстави на таквиот чекор и, наместо тоа, сака да го искористи фондот за клима и трансформација на земјата, сегмент што веќе е во дефицит. Тоа сугерира дека предлогот сè уште може да се соочи со политичко одбивање.
Минатата година германската влада воведе привремени субвенции за гас и електрична енергија, но тие постепено ќе бидат укинати најдоцна до април 2024 година. Предлогот на Министерството за економија вклучува пристап во два чекора, кој има цел да ги намали цените на електричната енергија по 2030 година, кога земјата цели да добива 80 проценти од својата произведена енергија од обновливи извори.
- Цената на струјата, субвенционирана од државата, треба да биде достапна за ограничен круг на енергетски интензивни фирми од сектори како хемија, челик, метал, стакло или производство на хартија.
- Субвенцијата е ограничена на 80 проценти од потрошувачката на енергија.
- Таканаречените договори за покривање на ценовната разлика треба да помогнат поевтините трошоци да се пренесат и за обновливата енергија и треба да се користат за офшор-паркови со ветерници и сончева енергија на брегот.
Канцеларот Олаф Шолц во разговор за „Рајн-цајтунг“ (Rhein-Zeitung) неделава повика на конкретна дискусија за поевтина електрична енергија за индустријата што би била можна без тие цени да бидат трајно субвенционирани.
На прашањето за предлогот на Министерството за економија, Надин Калвеј, портпаролка на Линднер, на вчерашната прес-конференција рече дека нема финансиски средства за таков проект.
