Миновски: Не очекувам поскапување на струјата за домаќинствата

Потребна е јасна стратегија за енергетска транзиција за да се намали увозната зависност и таа треба да се направи заедно со сите чинители во општеството, смета Драган Миновски, универзитетски професор.

„Мислам дека треба да се направи една јасна стратегија за енергетска транзиција за наредниот период, со краткорочни, среднорочни и долгорочни цели, кои треба да си ги постави државата, стратегија што ќе биде контролирана и во делот на реализацијата и во делот на подготовката од едно централно место на централно ниво и понатаму разгрането на сите локални заедници. Во таа стратегија треба да бидат вклучени сите, најбитно е да бидат вклучени граѓаните, невладиниот сектор, академската фела и енергетските авторитети во целата држава и да се имплементираат што е можно повеќе иновативни решенија во делот на обновливи извори на електрична енергија, но и системи за складирање електрична енергија што се клучни во наредниот период“, објаснува Миновски.

Професорот во разговор за „Блумберг Адрија“ вели дека не очекува повисоки цени на струјата за домаќинствата од наредната година, но за компаниите што се на слободниот пазар цената секако дека ќе зависи од берзанските движења.

„Мислам дека со зголемено производство на електрична енергија не би требало домаќинствата, како крајни потрошувачи, да имаат зголемени цени од 1 јануари наредната година. Во делот на индустријата цените се берзански, се менуваат од ден на ден, меѓутоа, доколку имаме стабилно снабдување со енергенти во Европа и стабилно производство, тогаш не очекувам некое драстично зголемување на цената во наредниот период“, вели Миновски.

Тој не очекува ниту рестрикции или проблеми во снабдувањето со струја и природен гас.

„Јас не очекувам некакви прекини во испораката или, пак, рестрикции во делот на снабдувањето со електричната енергија, од причина што мислам дека производството во моментов е стабилно и кај нас и во регионот и ако евентуално има одредени тешкотии во производството кај нас, сепак електрична енергија ќе се обезбеди од околните држави во регионот. Во делот на снабдувањето со природен гас, да, слушнавме некои најави дека се можни прекини во испораката преку Украина, но во делот на испораката преку Турција, од каде што се снабдува нашата држава, не би требало да има некакви прекини“, вели Миновски.

Целиот разговор со универзитетскиот професор за „Блумберг Адрија“ погледнете го во видеото.