.webp){kind=icon}
И надлежните и експертската јавност сметаат дека не треба да се стравува од рестрикции ниту од зголемување на цената на струјата. Во денешната емисија „Зум ин“ на Блумберг Адрија ТВ, на тема справување со енергетската криза, зборуваат Дарио Николовски, директор на Агенција за енергетика, и Драган Миновски, универзитетски професор.
Миновски вели дека има реални шанси цените за струјата од првиот и вториот блок да останат непроменети од сегашните.
„За очекување е да имаме намалување во однос на трошоците за пренос и за дистрибуција на електрична енергија, бидејќи за очекување е да се намали преносната и дистрибутивната такса, со оглед на тоа дека ЕСМ ќе понуди пониски цени за покривање на загубите во дистрибутивниот и во преносниот систем“, вели универзитетскиот професор Драган Миновски, според кого на овој начин ќе се искомпензира повисоката понудена цена од страна на ЕСМ кон „ЕВН хоум“.
Миновски смета и дека домаќинствата и малите потрошувачи не треба да стравуваат дека ќе останат без напојување со електрична енергија. Истото тоа важи и за потрошувачите на слободниот пазар. Според Миновски, единствен ризик постои во делот на снабдувањето со гас, бидејќи во моментов се снабдуваме само од една конекција, и тоа со руски гас, но се прават напори за евентуално алтернативно снабдување од други извори. Сепак, за оваа зима не очекува проблеми ниту во овој дел, иако напоменува дека се можни ценовни осцилации, особено ако се намалат температурите и се зголеми потребата за електрична енергија.
Во однос на барањата на стопанството за олеснување на процедурите и на документацијата за инсталација на фотоволтаични и ветерни централи, директорот на Агенцијата за енергетика, Дарио Николовски, вели дека Владата веќе презела повеќе чекори во таа насока.
„Во јули годинава надлежните институции со измени во правилникот овозможија зголемување на можноста за производство на електрична енергија за домаќинствата од четири на шест киловати, а за малите потрошувачи од 20 на 40 киловати. Со тоа нудат можност секој производител и потрошувач да го зголеми производството на електрична енергија за сопствени потреби, а Владата, пак, донесе измени во Законот за градба, каде што комплетно ги олесни процедурите за поставување фотонапонски централи на сопствените покриви“, вели Дарио Николовски, директор на Агенцијата за енергетика.
Николовски и Миновски зборуваат и за повеќе други прашања поврзани со енергетиката, а целиот разговор може да го погледнете во видеото.
