.webp){kind=icon}
„ЈП Морган“ (JPMorgan Chase & Co.) го поддржува стартапот што има цел да го затвори глобалниот јаз во испораката на бакар, металот што е клучен за економијата во делот на чистата енергија.
„Мајнсенс технолоџис“ (MineSense Technologies Ltd) собра околу 42 милиони долари во делот на вложувањата што ги води тимот за одржлив раст на капиталот на „ЈП Морган асет менаџмент“ (JP Morgan Asset Management), се наведува во соопштението објавено денеска.
Приватната компанија користи комбинација од софтвер и хардвер за да им помогне на рударските компании во попрецизно и побрзо мерење на рудата, што го зголемува производството и го намалува отпадот. Средствата ќе се користат за зголемување на комерцијалната примена на производите на „Мајнсенс“.
Технологијата на компанијата со седиште во Ванкувер го зголеми производството во постојните рудници од 5 до 25 проценти, се наведува во нивната изјава. „Компанијата има поголеми амбиции, за пополнување до 10 проценти од глобалната празнина во испораката на бакар“, вели главниот извршен директор на „Мајнсенс“, Џеф Мор.
Инаку, се заканува историски дефицит од бакар, металот што се користи во електричните возила и електричните мрежи, и тоа токму во период на ветувања од страна на владите и корпорациите за климатските промени.
Според студиите што ги финансира индустријата „СП глобал“ (S&P Global), во светот до 2035 година ќе недостигаат дури 10 милиони метрички тони бакар.
Стартапот со седиште во Ванкувер веќе ја примени својата технологија во големите рудници за бакар, вклучувајќи го чилеанскиот Колауаси, еден од најголемите светски рудници за бакар, кој е во заедничка сопственост на „Англо американ“ (Anglo American Plc), „Гленкор“ (Glencore Plc) и „Митсуи“ (Mitsui & Co). Тие, исто така, работат во рудникот Антамина во Перу, кој е во заедничка сопственост на „Тек ресурсис“ (Teck Resources Ltd), „БХП груп“ (BHP Group Ltd), „Гленкор“ и „Митсубиши“ (Mitsubishi Corp).
