.webp){kind=icon}
Нафтата поевтини во пресрет на одлуката за монетарната политика на американските Федерални резерви (ФЕД) по порастот од шест проценти во претходните две сесии на тргување. Потрошувачките цени во САД, објавени вчера, забележаа најмал месечен раст во повеќе од една година, што укажува дека најлошата инфлација веројатно помина и тоа поттикнува надеж дека ФЕД ќе го забави темпото на раст на своите каматни стапки.
ВТИ (West Texas Intermediate - WTI) се симна кон нивото од 75 долари за барел, а падна и глобалната референтна вредност за нафтата брент. Поточно, ВТИ за испорака во јануари падна за 0,3 проценти, на 75,14 долари за барел, а за исто толку падна и нафтата брент за испорака во февруари и сега барел се продава по цена од 80,41 долари.
Кина ги зголемува напорите за вакцинација додека нацијата забрзано ја укинува својата политика на нулта ковид, која оваа година ја оптовари нејзината економија. Порастот на бројот на инфицирани случаи предизвика загриженост за краткорочната побарувачка за енергија, но се очекува дека ублажувањето на ограничувањата долгорочно ќе ја поттикне потрошувачката на овој производ.
Движење на цената на ВТИ и нафтата брент / Bloomberg Mercury
Нафтата и натаму е на пат да го оствари својот прв последователен квартален пад од 2019 година поради загриженоста за глобалната економија. „Голдман сакс“ (Goldman Sachs Group Inc) ги намали своите прогнози за цената на нафтата за почетокот на следната година поради слабите изгледи, додека ОПЕК ги намали процените за количествата сурова нафта што ќе мора да се испумпуваат во претстојните месеци.
„ОПЕК сигнализира малку послаба пазарна рамнотежа во првото тримесечје од 2023 година. Одовде гледаме добра страна, особено со проблемите во делот на понудата, како што се одложувањето на рестартирањето на 'Кистоун' и ограничувањето на цената во Русија“, рече Џејмс Вислер, извршен директор на „Ванир глобал маркетс“ (Vanir Global Markets Pte).
„’ТЦ енерџи’ (TC Energy Corp) планира да рестартира само дел од нафтоводот ’Кистоун’ во текот на утрешниот ден, а целосното пуштање во функција би било на 20 декември“, велат извори запознаени со состојбата. Лошото време го спречи претходно планираното рестартирање.
Американскиот институт за нафта што ја финансира индустријата извести дека комерцијалните резерви на сурова нафта во САД минатата недела пораснале за 7,82 милиони барели.
Меѓународната агенција за енергија подоцна во текот на денов ќе го објави и својот преглед на пазарот на нафта во својот најнов месечен извештај.
