Вредноста на златото падна по вчерашниот солиден раст

Златото падна во Азија откако претходно скокна на осуммесечен максимум во вчерашната сесија на тргување во услови на затемнети економски изгледи во САД и Европа. Заменик-претседателката на Федералните резерви (ФЕД), Лаел Брејнард, рече дека стапките во САД ќе треба да останат високи одреден период за да се залади инфлацијата, додека претседателката на Европската централна банка (ЕЦБ), Кристин Лагард, вети дека нема да попушти во напорите растот на цените да се врати во посакуваните рамки до два процента.

Во Јапонија инфлацијата достигна четири отсто за првпат по повеќе од четири децении. Артиклите поскапуваат од почетокот на ноември поради знаците дека банкарите од ФЕД станаа помалку внимателни, но и поради тоа што приносите на доларот и државните обврзници се намалуваат.

Златото може да има корист од зголемувањето на побарувачката за него, како сигурно прибежиште, бидејќи изгледите за американската и европската економија се затемнуваат, иако се очекува Кина да закрепне подоцна оваа година.

Цената на златото утрово се намали за 0,4 отсто и достигна 1.924,23 долари за унца, откако вчера скокна за 1,5 процент. Инаку, сè уште е на пат да оствари петта последователна неделна добивка.

Индексот за вредноста на доларот на „Блумберг“ се зголеми за 0,1 отсто. Среброто се тргува стабилно, додека платината и паладиумот паднаа.

Економските податоци од САД оваа недела насликаа мешана слика. Побарувањата од невработените неочекувано паднаа на најниско ниво од септември, според податоците објавени во четвртокот, што ја нагласува силата на пазарот на трудот. Тоа дојде по бројките од почетокот на неделата, кои покажаа пад на продажбата на мало и помала инфлација на производствените цени.

Во моментов нема коментари за веста. Биди прв да коментира...

Остави коментар